Antoneddu Cucureddu

Dae Wikipedia, s'entziclopedia lìbera.

Antoneddu Cucureddu (S’Alighera, 04/10/1.949) est un’acussadore sardu de fùbalu e zogadore antigu, de posissione defendidore.

Impreadu comente brincadore (defendidore e mediucampista), aiat reveladu capatzidades bonas de atacu: su primu golu cun sa màllia de sa Juventus nche fiat crompidu contra a su Casteddu, e fiat istadu su primu de sa fiolera de 26 realizaduras in sa sèrie A durante sa carrera sua in arbunieddu – nd’aiat marcadu 39 in totale – chi l’aiant rènnidu unu de sos defendidores-mediucampistas prus prolìfigos de totu sos tempos in sa sèrie prus arta.

Cumintzat sa carrera sua fubalenca cun s’echipa de sa bidda sua; posteriormente, in s’istajone 1.966-1.967, est cuntratadu pro duos milliones de francos betzos dae sa Torres, in ue l’impreant de mediucampista. In s’istajone 1.967-1.968, si tràmudat a ue su Bressa in sa sèrie A, sena marcare puntos. In su 1.969, sa Juventus lu cuntratat dae su Bressa pro batorghentos milliones de francos betzos.

Su golu prus importante de sa carrera sua l’aiat marcadu su 20 de maju de 1.973, in tempus de s’ùrtima zorronada de su campionadu 1.972-1.973: in s’ìnteri chi su Milan, ch’in sa crassifigadura teniat unu puntu prus che sa Juventus, perdiat 5-3 in Berona, sa Juventus resessiat a refagher s’incuimentu initziale in su terrinu de sa Roma, a sa prima agualende peri Altafini e posca binchende 2-1 a tres minutos dae s’agabu, cun unu tiru dae foras de arzola de Cucureddu. Custa bintòria aiat permìtidu a sa Juventus de bincher su de 15 iscudetes suos.

Cucureddu aiat zogadu finas a 12 istajones cun sa camiseta de sa Juventus e, in su campionadu 1.981-1.982, si fiat tramudadu a ue sa Frorentziana, in ue aiat cuncruìdu sa carrera sua in sa sèrie A pro neghe de diferentes lesiadas in s’ischina. In su 1.984-1.985, aiat terminadu sa carrera sua de fubaleri cun su Noara in sa sèrie C2. Fiant istadas 13 in totale sas acudidas de Cucureddu a s’internassionale (sa prima fiat istada in su 1.975), totus in s’èpoga de Bearzot: intre custas, sunt incrùdidas sas chimbe partidas disputadas in su campionadu de su mundu de 1.978 in Arzentina. S’ùrtimu addòviu de Cucureddu in s’internassionale remontat a su nadale de 1.978 contra a s’Ispanna.