Antoni Simon Mossa
Articulu in nugoresu
| « S'innorantzia nostra nos juchet a tenner in menispressiu tottu su chi est nostru. » |
| « Si unu populu no l'ottenet s'indipendentzia politica sua, no podet esser suzetu de s'istoria sua ma at a abbarrare a s'umbra de sa nassione chi l'à' binta e dominada. » |
Antoni Simon Mossa (Padova, 22 de Sant'Andria de su 1916 – Tàtari, 14 de trivulas de su 1971) est istau un'architettu, zornalista, poete, iscritore e politicu, esponente ideolozicu de s'indipendentismu sardu.
[acontza] Biografia
Si ch'est laureau in architetura e cumintzat a traballare in Tatari e in S'Alighera, in ube s'interessat meda de su sardu e de s'aligheresu, tantu chi nd'at iscrittu unu libberu 'e grammatica e, in su mes'e Capidanne de su 1959, fravicat un'iscola chi s'imparabat in cue s'archeolozia, s'istoria e sa curtura sarda in custu limbazu. Dae su 1961 pro dech'annos divenit presidente de su sotziu curturale aligheresu ch'aiat fundau, su Centre d'Estudis Algueresos. In su mentras at fattu viazos 'e istudiu peri sa Catalugna, sa Corsica, su Paisu Bascu, sa Galitzia, s'Alsatzia, sas Friandas, su Galles ei s'Iscotzia, addobiande sas pessonalidades 'e su locu. Cumintzat a picare s'istrada de su nassionalismu sardu in cuntierra chin su messazu tradissionale autonomista de s'ala sardista. S'allegat de facher torrare s'identidade sarda a sos sardos, comunidade chi tenet un'istoria, una curtura e limba propia chi si ch'est isperdende. Pessat chi s'unica manera de nch'essire a capu dae su neocolonialismu italianu siet cussa de su sotzialismu e, una vorta chi s'at tentu s'indipendentzia, si deppat fravicare una federassione europea chi nde diat facher parte s'isula aende cuntattos mascamente chin sa Corsica e sa Catalugna. At fundau, paris chin Zuanne Pedru 'e Marras, prima su "Muimentu Indipendhentistigu Revolussionàriu Sardu" e pustis su gruppu "Sardigna Libera". Morit de maladia in su 1971.
