Barbàgia

Dae Wikipedia, s'entziclopedia lìbera.

Nùgoro-Istemma.png
Articulu in nugoresu
Nùgoro-Istemma.png

Supramonte de Ulìana - Punta Corrasi

Sa Barbàza o Barbàgia (in italianu Barbagia) est una rezòne istòrica de sa Sardinna; cumprèndet sa Barbagia de Nùgoro, sa de Ollolai, sa de Brevìe, sa de Seulu, su Mandrolisai (Barbagia 'e Mandrolisai) e s'Ozastra (Barbagia Trigònia). Sa Barbagia si isterret pèri un'area de unos 1.300 km² e cun 120.000 bividores.

Istoria[càmbia | edit source]

Sos barbaritzinos benin dae sas populassiones prenuraghesas e nuraghesas de sa Sardinna de su millenniu de IV a.C. Sos punicos non bi la an fatta mai a bincher sos muntagninos de sa Sardinna tzentrale e settentrionale. Bi aìat, prusaprestu, carchi rapportu de cummertziu e cunviventzia. Fintzas sos romanos an tentu problemas in cùe, cun sos Balares, Cossos e Ilienses chi fachìan resistentzia e bardana a su populu invasore: a custos sos romanos los an muttidos Civitates Barbariae e, a pustis in edade imperiale e vandalica, Barbaricini.

Gennargentu - Genna Orisa

Tando, est làdinu e craru chi su toponimu "Barbagia" benzat dae su latinu Barbaria. Su protzessu de assimizatzione culturale in Sardinna fit andadu a bellu a bellu, e fit andadu bene petzi ca sos romanos bi aìan fattu bènner e accudire zente latina, chi dìat àer vividu in sa terra propria de cussa nuraghesa. De importu fit pèri s'arrolamentu de sardos in s'esertzitu imperiale, comente mertzenarjos o sordados in cohortes pretzisas.

Ja pacu innantis chi s'Imperiu Romanu de Otzidente fit ruttu in disgrassia, in su 476, sa Sardinna si la aìan leada sos Vandalos, tribù barbarica chi, a pustis de aer conchistadu s'Africa Romana in sos annos 430, aìat fattu una frotta potente picandesi sas isulas de su Mare de Mesu otzidentale. Su dominiu vandalicu in Sardinna est adduradu fintzas a su 534, cando Justinianu I, imperadore de Oriente, fit resessidu a torrare a conchistare s'isula pro s'Imperiu Romanu de Oriente. Sas fontes istoricas chi nos abbarran de cussu tempus sun de Procopiu e sas 39 literas de Papa Gregoriu I (590-604). Dae sas literas de su papa semus a connoschentzia de duas Sardinnas: una latinitzada e cristiana (cussa de sos Provinciales), s'attera (sa Gens Barbaricina) pagana e gubernada dae Ospitone.

Pro mediu de sa diplomatzia, in s'istiu de su 594 bizantinos e sardos barbaritzinos fin crompidos a unu accordu chi bidìat, tra sas atteras cosas, su cunvertimentu de tottus sos sardos in ìe a su cristianesimu. Pro evanzelizare a fundu sa Sardinna e sa Còssiga, Gregoriu Mannu aìat intregadu sas duas isulas a sos Benedettinos, chi bi an abarradu pro tottu s'edade de mesu.

Sa Barbagia si la aìan partida, dae su seculu de IX a cussu de XV d.C, sos battor judicados sardos de Torres, Gallura, Arbaree e Calaris.

Natura de su locu[càmbia | edit source]

In sa Barbagia si poden atzappare roccas de granitu e fortilesas de su Gennargentu, si podet andare dae sos montes de Ulìana a sa badde de su Tzedrinu, fìntzas a sos masones de Seui e Ollolai. Sun meda diffùndios e riccos de animales sos buscos de eliche, chiniperu, tassu e cherchizola.