Boladoreddu

Boladoreddos apicados a unu muru

Su boladoreddu est una pubrigadura de tirada limitada formadu dae una o duas pàzinas imprentada in una o totu sas caras. Est impreadu pro informare in manera lestra e intregosa s'aprofetadore possìbile, chi fitianu nd'intrat a possedimentu pro casualidade, in unu tipu determinadu de eventu, idea, prozetu, ozetu.

Istòria

Unu de sos impreos prus famados de su boladoreddu in s'istòria italiana fiat istadu in s'ocasione de su bolu subra de Bienna de un'iscadrilla de s'abiadura itailiana liderada dae Gabriele D'Annunzio, chi su 9 de austu de 1918 aiat fulliadu a subra de sa tzitade unos 50.000 boladoreddos propagandistas. Su boladoreddu “militare” sighit a esser meda utilizadu a dies de oe pro ispainare dudas e timòrias in sas pobuladuras.

Impreu pubritzitàriu e propagandista

Atuarmente si nde faghet impreu meda in su setore de sa pubritzitade, in ue s'informadura si lìmitat a proponner unu servìtziu, unu produtu o una marca.

Sende gasi, est utilizadu in onzi ocasione chi dimandet su beiculonzu de un'informadura sintètiga a unu pùbrigu possìbile, duncas in su domìniu polìtigu, sindigale, propagandista. S'operadura de repartzidura de sos boladoreddos a sos destinatàrios possìbiles podet acontesser in modu deretu, peri intrega a manu, o in manera indereta a mèdiu de s'insertadura de su boladoreddu a sa cassita de su curreu o a su parafrinas de sas automòbiles, in un'atividade chi est definida boladoreddamentu.

S'impreu propagandista de su boladoreddu (chi zai esistiat in su milliotughentos in sos moimentos patriòtigos bariados, pro narrer cun sas fulliadas fontomadas de boladoreddos in intro de manifestadas teatrales dae sas lollas de susu a sa corte de cadirones) nch'aiat sizidu su cùcuru suo in sos annos '60 e '70 de su sègulu coladu cun s'ispainadura intre sos grupos polìtigos minores de su murticopiadore.

Ordinàntzias comunales

In medas comunas italianas, formas de repartzidura de boladoreddos sunt reguladas dae ordinàntzias comunales chi apostìvigant si siant lizìtimas o nono, e nde cundissionant s'atividade a su pagamentu de un'impòsitu. Difatis, in sas tzitades mannas, pro realizare su boladoreddamentu manu-a-manu est pretzisu a pagare un'impòsitu subra de sa pubritzidade, chi andat dae 5 euros sa die pro onzi piseddu impreadu in sa repartzidura in sas comunas de Milanu e Nàpule a sos 5 chentèsimos de euro pro onzi boladoreddu repartzidu in Roma. Unu casu raru est rapresentadu dae sa comuna de Zènova, ch'in su 2.004 at proibidu su boladoreddamentu manu-a-manu. Su boladoreddamentu in sas automòbiles est proibidu in belle totu sas comunas italianas.