Genotzìdiu cambogiànu

Dae Wikipedia, s'entziclopedia lìbera.


Artìculu in LSC

Mapa de sa Cambògia fata cun sas calaveras de sas vìtimas de su genotzìdiu
Templu remmonativu de Choeung Ek, logu de unu de sos killing fields (campos de bochidura)

Sa de genotzìdiu cambogianu o auto-genotzìdiu cambogianu est sa definitzione cun chi s'inditat su protzessu de limpiadura de su pòpulu cambogianu a òpera de su regìmene e sos Khmer Rujos, partidu polìticu chi at guvernadu sa Cambògia (torrada a numenare de issos etotu Kampuchea Democràtica) intre su 17 de abrile 1975 e su 7 de ghennàrgiu 1979.

Sos Khmer Rujos persighiant unu ideale de istadu agràriu sotzialista fundadu subra sos ideales de su stalinismu e su maoismu, a chi punnaiant de imbàtere torrende a acussorgiare sa populatzione de sas tzitades a sas incontradas. Pro bi arribare no timiant de si nche apellare a torturas, degòllios de massa, traballos fortzados, chi ant tentu resurtu in sa morte de unu perchentu carculadu a unu 25% de sa populatzione natzionale.

S'intentu issoro de purificatzione de su pòpulu, simbillante a sas tareas de su nazismu de su Reich de tres, fiat de criare una ratza superiore.

Est petzi gràtzias a s'invasione de sas trupas vietnamesas chi su regìmene at tentu agabbu. Atualmente si contat unu nùmeru de vìtimas causadas de su regime cumpresu intre 800.000 e 3.500.000, de chie 300.000-1.000.000 cundennadas a morte. Sunt fintzas istadas iscugugiadas unas 20.000 fossas comunas in logos pretzisos chi fiant de issos narados killing fields.

Su nùmeru de mortos ispantat galu prus chi si pentzat ca sa populatzione cambogiana no imbatiat tando a 8 milliones: segundu sas istatìsticas in su 1975, annu de s'artziada a cumandu de sos Khmer Rujos sos tzitadinos cambogianos beniant a èssere unos 7,5 milliones, in su 1978 petzi 5 milliones.

Su 2 de ghennàrgiu 2001 su guvernu cambogianu at aprovadu una legislatzione pro protzessare unos cantos gerarcas Khmer Rujos.

Sos protzessos ant tentu inghitzu su 17 de freàrgiu 2009. Su 7 austu de su 2014 Nuon Chea e Khieu Samphan sunt istados cundennados a morte cun imputu de s'èssere responsàbiles de crìmenes contra s'umanidade.