Ipermercadu

S'ipermercadu rapresentat una tipolozia de operadore de sa distribuidura manna organizada. Est caraterizadu dae un'arzola echipada pro sa bèndida a sa minuda cun superfìtzie de bèndida superiore a 2.500 metros cuadrados.

Cun s'aumentu isponentziale de sas superfìtzies de sos ipermercados, issos sunt istados partzidos in sutacategorias: dae 2.500 a 4.000 m2 si faeddat de mini-iper, intre 4.000 e 10.000 m2 si faeddat de ipermercados propiamente narados, addae de 10.000 m2 si faeddat de ipermercados mannos (o megacumèrtzios). Su formatu mini-iper si subraponet partiarmente pro metradura a su formatu supercumèrtziu (1.500-3.000/3.500 m2): su chi diferèntziat sos duos formatos sunt su pesu e s'istrutura distinta de su setore no alimentàriu.

S'ipermercadu si distinghet pro s'assortimentu ampru de issèberu e est cumpostu dae siendas alimentàrias e àtera cosa. Si un'ipermercadu bendet petzi màndigos e deterzentes, es definidu “iperalimentàriu”.

In sa punna atuale, si sunt isvilupende assortimentos cun benes de cunsumidura mesuduràbiles (no alimentàrios), pro narrer produtos eletrònigos che installaduras istereofònigas, telebisuras, ràdios, eletrotzeracos, elaboradores, ozetos relassionados cun sa telefonia, eac.

S'istrutura cumprendet fitianu unu nùmeru cussideràbile de àteras butegas (galleria) chi cùmbidant assortimentos diferentziados pro calidade o preju. In su casu naradu, si faeddat de tzentru cumertziale.

Curiosidades

Su primu ipermercadu de Itàlia est istadu inaguradu in su cabudanni de 1.971 dae Montedison in Castellanza (Baresu) cun s'insinna “maxi STANDA”. Dae su 9 de martzu de 2.012, est devènnidu ufissiarmente un'ipermercadu de sa cadena italiana Il Gigante.

In custu mamentu, s'ipermercadu prus istèrridu de Itàlia est su Carrefour de Assago (Milanu), cun una superfìtzie de 16.100 m2, sighidu dae s'Auchan de Rescaldina (Milanu) de 16.000 m2 e dae su Carrefour de Carugate (Milanu) de 15.507 m2.

In Itàlia, su formadu de sos ipermercados est dominadu dae cadenas frantzesas e grupos cooperativos italianos logales suta de s'insinna Ipercoop.