Isulas de Okinawa

Dae Wikipedia, s'entziclopedia lìbera.

Coordinatas: 26°19′58″N 127°44′56″E / 26.332778°N 127.748889°E26.332778; 127.748889

Nùgoro-Istemma.png
Articulu in nugoresu
Nùgoro-Istemma.png

Castèddu de Shuri.
Lòsa de Kamekoubaka.

Sas ìsulas de Okinawa (沖縄諸島 Okinawa Shotō) sun su grùstu prus mannu de s'agorru de ìsulas o, pro lìu nàrrer atteramènte, de s'arcipelagu de sas Ryukyu (1485 km²) e cumprènden s'ìsula de Okinawa etòttu e atteras prus minòres.

Fàchen parte de sa prefettura de Okinawa, chi dae su 2003 si istèrret pro 2265 km² chin 1.345.000 pessònes: su capu de locu est Naha (Naafa in limba de Okinawa). In Okinawa bi at 9 tzittàdes, a pùstis bi at tzittadèddas minòres e bìddas chi fòrman 3 cussòrjas (distrèttos).

Fìntzas a su 1300 d.C. Okinawa fit un'istàdu indipendente, in ube su rezìmene isseperàu fit sa monarchìa: tra su Treschèntos e s'Ottichèntos at dèpiu pacàre tassas medas a sa Tzìna. In su 1879 su Giappone si pìcat Okinawa conchistànde s'isula e ponènde accàbbu a su gubernu suo. In su mese de martzu e aprile de su 1945, est in custas ìsulas chi sas fortzas americanas e giapponesas aìan gherràu in sa battàlla sambenòsa de Okinawa, chi dae cùghe pìcat su lùmen: mescamènte in su disimbàrcu americanu de su prìmu de aprile bi aìat àpiu zente meda, dae ambas partes, a bi pèrder sa vida. Cando sos americanos aìan bìntu a sos giapponesos, s'isula de Okinawa fit colàda in manu de sos binchidòres fìntzas a su 1972. Eppuru, comènte est sutzèssu in Sardigna, bi at galu oje una presèntzia forte de militares istrànzos chin sas bases issòro, fachènde a s'ispìssu dannu mannu sìat a su locu sìat a sa zènte sua.

Dae Okinawa bènit s'arte fentomàda de su karate, naschia a s'aunimentu de sas artes martziales tzinèsas chin s'Okinawa-te (tando partìu in Naha-te, Shuri-te e Tomari-te). In prus, a libèllu istatisticu est a ammentàre chi, impàre a sos sardos, sos de Okinawa sun sa ratza a campàre de prus: s'isula est unu locu biaìttu. Carchi mèdicu nàrat chi custu sìat pro mòre de unu avvesu a mandicàre sanu e de una vìda colàda ind unu ambiente pacu imbruttàu, chi si est isperdènde ca parte de sa populassiòne si est accostumàda a mandicàre americanu.