Louis-Ferdinand Céline

Dae Wikipedia, s'entziclopedia lìbera.

Flag of the Italian region Sardinia.svg
Articulu in LSC
Flag of the Italian region Sardinia.svg

Retratu de Louis-Ferdinand Céline

Louis-Ferdinand Céline, nàschidu Louis Ferdinand Auguste Destouches (Courbevoie,27 maju 1894 - Meudon, 1 triulas 1961), fiat unu mèdicu e iscritore frantzesu. Céline, chi est su nomìngiu chi usaiat pro firmare is òperas suas, fiat su nòmene de s'ajaja. Est su prus traduidu e legidu iscritore frantzesu de su seculu XX a segus de Marcel Proust.

Sa pensada sua est pessimista e tipicamente nichilista. Est cunsideradu unu de sos prus mannos annovadores de sa literadura frantzesa intre sos contemporaneos, ca pro ite at intradu unu istile personale chi chircat de mentènnere sa fortza emotiva de sa limba chistionada.

Comente persona abarrat però pagu istimadu de medas criticos pro sas positziones politicas. Difatis Céline fortzis collaboraiat cun is nazistas e b'at fintzas carchi pamphlet chi lassat creere chi esseret antisemita.

Vida[càmbia | edit source]

Nàschidu in Courbevoie, Louis Ferdinand Auguste Destouches est fìgiu solu de Fernand Destouches (Le Havre 1865 - Parigi 1932) e de Marguerite Guillou (Parigi 1868 - Parigi 1945). Su babbu est impreadu assigurativu e a narrere de s'iscritore de origines nobiles, sa mamma mercadera de rendas.

In gioventude non tenet fortuna comente butegheri de oru, duncas benet mandadu de su babbu a s'esteru pro imparare is limbas. Bivet carchi meses in Inghilterra e Germània. In su 1912, a degheoto annos intrat in s'esertzitu frantzesu.

In su 1914 pigat parte comente volunteri a sos primos cumbatimentos de sa I Gherra Mundiale in Bèlgiu, in ue abarrat ingotu a unu bratzu, cun una balla infertzida in conca. Arretzit pro custu una medàllia de prata.

Benet mandadu a triballare in uffìtzios de su cunsoladu frantzesu a Londra, in ue abbitat logu de bagassimini e connoschet sa prima mugere, Suzanne Nebout, ma ant a abarrare impare isceti pagus meses. Sa gherra ddi lassat rastos siat dèpidos a sas feridas, siat de mente: tenet difficultade a si dormire e intendet frùschios a is origas. Incomintzat como a intendere su sentidu de affannu e dibilesa pro sa vida, chi at pois a caraterizare sa pensada sua.

In su 1916 partit in Camerùn cun sa Compagnie Francaise Shanga Oubangui, pro abbaidare a unu prantementu de cacao. Noe meses a pustis torrat in Frantza maladiadu de malaghera.

Agabada sa gherra andat a bìvere a Rennes e cògiat Édith Follet, fìgia de unu diretore de iscola de meighina, e si laureat in meighina in su 1924. Sa tesi, subra su traballu de su mèdicu ungheresu Ignàc Fülöp Semmelweis, podet essere cunsiderada sa prima opera sua de literadura.

De su 1924 a su 1928 traballende pro sa Sotziedadi de is Natziones viàgiat meda siat in Inghilterra e Isvìtzera ca in Àfrica e in Amèrica. Torradu in Frantza andat a bìvere in Montmarte in ue si òcupat giai a gratis de attèndere comente mèdicu sos pòboros e comintzat a iscriere su romanzu 'Voyage au bout de la Nuit', s'òpera sua prus famada.

In is annos '30 cògiuat sa baddadora Lucie Georgette Almansor, chi diventat sa mugere de tres.

In su tempus de su regime de Vichy, Cèline non si decrarat mai fascista e sa pensada sua est tropu pessimista e nichilista pro podere torrare ùtile a sos gerarcas. Prusaprestu, abarrant iscritos e affirmatziones subra sas ratzas e is ebreos chi lassant dudosos e pro chi in is annos a sighire s'iscritore s'at a dèpere giustificare medas bortas. No ant a mancare fintzas acusas de negatzionismu.

B'est de narrere ca in su 1934 circhende s'amada Elizabeth Craig in sos Istados Unidos, dd'aiat agatada cogiuada cun unu òmine ebreu e ca sa de is losingas de òmines ebreos a fèminas arianas est chistione chi torrat in sos pamphlets incrimenados.

Agabada sa Segunda Gherra Mundiale benet cundannadu a s'esìliu e si nche fuet in Danimarca, in ue bivet in clandestinidade impare cun sa mugere. Cassados su 17 de nadale 1945, benent arrestados e cundannados a batòrdighi meses de presone. In su 1951 a pustis de maladias e àteras cundennas de su tribbunale de Parigi, torrat in Frantza, un ue però non tenet vida fàtzile, essende inditadu comente nazista de totus is iscritores de manca, chi nde cherent iscantzellare sa memòria (francu Albert Camus, mancari issu atotu apat fintzas cumbatidu comente partigianu).

De fatu Céline at a essere discoidadu non isceti in Frantza ma in totus is natziones de Europa.

Torradu de su disterru si trasferit a bivere a Meudon, tzitade pagu a tesu de sa capitale in ue faghet vida retirada, traballende siat comente iscritore, siat comente mèdicu, mancari siant pagus meda is chi ancora cherent si faghere curare de issu. Morit sa prima die de trìulas in su 1961 a sighidu de una emorragia a su cherbeddu. Sa morte sua benet pagu cunsiderada de s'imprenta, prus pagu cando s'incrasa morit unu àteru grandu e meda prus istimadu iscritore: Ernest Hemingway.

tumba
Sa tumba de Céline

Est cumbintu fintzas a sa morte ca at a èssere interradu in su campu santu de Père Lachaise, ma sa mugere ischiende ca s'opinione pùbrica non diat èssere de acòrdiu, du faghet interrare in Meudon.

Òpera[càmbia | edit source]

Cunsideradu unu de is prus importantes iscritores esistentzialistas, sos iscritos suos sunt caraterizados de pessimismu e nichilismu. Su chi prus nde faghet manna s'opera est su limbàgiu chi usat: chircat difatis de cuncordare unu istile literariu cun sa fortza espressiva de su chistionadu. Pro su chi pretocat is temas, si podet agatare una forte cumponente autobiografica, contende cun sarcasmu arrabiadu dibilesas, bascesas e tonterias siat in sa sotziedadi ca in is personas, niunu escludidu. Sa leghidura si donat fatuvatu a su risu, ma est unu rìere grae de assatzu. Céline ponet a unu oru sos idealismos e chentza piedade bogat a pitzu is bisuras prus pudrigadas de sa realidade.

Bibliografia[càmbia | edit source]

Romanzos[càmbia | edit source]

  • Voyage au bout de la nuit, 1932
  • Mort à crédit, 1936
  • Guignol's Band, 1944
  • Casse-pipe, 1949
  • Féerie pour une autre fois, 1952
  • Normance : Féerie pour une autre fois II, 1954
  • D'un château l'autre, 1957
  • Nord, 1960
  • Le Pont de Londres / Guignol's Band II, 1964
  • Rigodon, 1969

Pamphlets[càmbia | edit source]

  • Mea Culpa, 1936
  • Bagatelles pour un massacre, 1937
  • L'École des cadavres, 1938
  • Les Beaux Draps, 1941

Ateros[càmbia | edit source]

  • Carnet du Cuirassier Destouches 1913
  • Des vagues, 1917
  • La Vie et l'Œuvre de Philippe Ignace Semmelweis, 1924
  • La Quinine en Thérapeutique, 1925
  • L'Église, 1933
  • Foudres et flèches, 1948
  • Scandale aux abysses, 1950
  • Entretiens avec le professeur Y, 1955
  • Ballets sans musique, sans personne, sans rien, 1959.
  • Progrès, 1978
  • Arletty, jeune fille dauphinoise, 1983
  • Préfaces et dédicaces, 1987
  • Histoire du petit Mouck, 1997
  • À l'agité du bocal, 2006
  • Céline vivant, 2007