Pallanuoto

Dae Wikipedia, s'entziclopedia lìbera.

Ozieri-Stemma.png
Articulu in logudoresu
Ozieri-Stemma.png

Sa Pallanuoto (in inglesu: Water Polo) est un'isport de abba de isquadra nàschidu in su de XIX sègulos in Inghilterra e in Iscòtzia, chi sas règulas fin istadas codifigadas pro sa prima bia in su 1887 dae William Wilson. Una partida de pallanuoto est disputada dae duas isquadras, onzi una formada dae sete zogadores, chi zughent unu cambussinu de colore diferente cunforme a s'isquadra e chi podent esser sustituìdos in tempus de s'addòviu pro unu nùmeru illimitadu de bias, francu in su casu chi cumitant tres fartas graes, su chi nche zughet in fatu s'ispellidura definitiva e sa sustituidura obrigatòria. Nadende in un'ispigru de aba, sos atretas devent frumbulare cun sas manos (s'àprigat pro sa partida intrea, cun sa dèroga de su zanneri, s'obrigadura de tocare sa botza cun una manu ebia) unu ballone su nùmeru prus mannu de bias chi si podat a intro de sa zanna rivale. Onzi bia chi custu acontessit, si realizat unu puntu, naradu finas golu o realizadura, che in su fùbalu. A s'agabu de sos bator tempos de zogu, s'isquadra cun su nùmeru prus artu de puntos est decrarada binchidora.

Incrùdida in su programma olìmpigu zai dae su 1900, sa pallanuoto est bènnida peri su tempus unu de sos isportos prus pobulares de sas Olimpìadas. Nostamis de sa pobularidade manna lograda a printzìpios de su de binti sègulos, abarrat una dissiplina ispainada mescamente in Europa, Istados Unidos e Austràlia, pratigada petzi in pagos paìsos de su mundu.