School Days

Dae Wikipedia, s'entziclopedia lìbera.

Nùgoro-Istemma.png
Articulu in nugoresu
Nùgoro-Istemma.png

School Days (スクールデイズ Sukūru Deizu?) est unu eroge (videojocu a isfundu eroticu) giapponesu chi sa 0verflow aiat isviluppau in su 2005 pro PC e PlayStation 2, vortau a pustis siat a manga siat a un'anime de 12 episodios in sa secunda medade de su 2007.


A su cumintzu paret una cummedia romantica calesisiat, ma prus a tardu at a picare in ziru su genere etottu chi li pariat pertennere. De tottus sos finales de su jocu s'anime nde picat unu, vortandelu a una manera unu pacu differente.

Istoria[càmbia | edit source]

Makoto Itou est unu pitzoccu chi a mannittu si la depet isbolicare chin sos primos problemas de amore. Est in amore chind una pitzocca (Kotonoha Katsura) chi biet cada manzanu picande su trenu paris chin issu, ma non li at galu mustrau sos sentidos suos e si limitat a la pompiare dae unu pacu atesu. Una die, chistionade chin sa cumpanza de bancu sua, Sekai Saionji, custa lu azuat a si facher a innantis pro connoschere Katsura e, sende issa puru in amore chin Makoto, lu atzetat e essin impare. Ma Sekai, chi sich'abizzat de esser zelosa pro Makoto, si ammorat de issu.

A custu puntu Makoto non biet s'ora de s'ispassiare, sessualmente faveddande, chin Katsura ma issa no est pronta e non resessit a bincher sa timoria e suspettu chi issu la cherjat petzi usare. Sekai, tando, non perdet tempus e si ammustrat pronta a "facher pratica" chin issu pro li imparare su chi in amore bi depet essere in s'intimidade.

Makoto iscoperit de custa manera sa sessualidade ma non si firmat a issa, cumintzat a si coddare chenza grabbu perunu peri sas atteras cumpanzas de iscola, fricandesiche de comente su cumportamentu suo facat male siat a Katsura (chi galu est s'ammorada "uffitziale") siat a s'antzedda Sekai, chi non aènde picau precautziones abbarrat puru prinza (o gai issa narat). A s'acabbu, sos contos cubaos che torran a pizu tottu e Makoto l'at a pacare chin sa vida, ca lu uchidet Sekai non fachendebìla prus, ma atteru samben sichit a iffundere sa terra: Katsura, oramai ammachiada de su tottu, secat sa conca a su cadavere de Makoto battindesichéla in ammentu de s'ammorau suo e, in sa punna de abberguare si abberu Sekai juchiat una criadura in intro, la irmattat.