Su mortorzu de Lisandru Froris

Su mortorzu de Lisandru Froris est unu fatu de cròniga niedda cun tela terrorista acontèssidu su 26 de martzu de 1971 in Zènova, chi sa bìtima, unu sardu naturale de Iscrèsias, fiat istada su trasportadore de fondos de s’Istitutu Autònomu de sas Domos Sotziales logale, ochìidu in su barigare de un’isrobatòriu de autofinantziamentu dae bandas de s’organizadura terrorista Grupu XXII de Santugaìne.

Acuntèssidas

Duos militadores de su grupu armadu XXII de Santugaìne aiant proadu su 26 de martzu a isrobare a Froris, trasportadore de fondos de 31 annos, baghianu, chi fiat trasportende una bussa chi cunteniat dinare, obetivu de sos isrobadores. Traballaiat dae tres annos in s’IADS e fiat prepònnidu a s’iscorta in tempus de s’intrega de sos soddos e sa tirada de sos balores.

Atacadu dae ambos òmines, su trasportafondos aiat aguantadu e aiat chircadu de brocare sa fua de sos malufaghedores agarrende-si a su burtzeddu de unu de sos duos in tempus de sa fua in lambreta. Sos isrobadores aiant reassionadu ochiende-lu cun unu tiru de pistola càlibru 38.

Arrestos

In tempus de s’assione, Ilio Galletta, un’istudante universidàriu, aiat fotografadu pro casualidade su mamentu de su mortorzu: sa foto fiat istada de azudu mannu pro sas imbestigaduras, e aiat tentu ispainadura in s’imprenta nassionale e internassionale. Aiat assìstidu a s’issena finas su deretore de pessonale de s’istitutu, chi aiat dispensadu una testimonia detalliada.

Sos malufaghedores, fuìdos in motighedda, fiant istados pessìghidos. Sos duos si fiant partzidos e unu de sos membros de su cummandu, Mario Rossi, fiat istadu detènnidu dae duos brigaderis. Su segundu fiat istadu identifigadu gràssias a sa proa fotogràfiga e detentu in s’annu posteriore.

Sos ligàmenes de Rossi cun sos grupos de assione partisana e su detenimentu de su segundu malufaghedore in un’apartamentu relassionadu cun su grupu nch’aiant essidu a campu un’annoditzu de acapiaduras intre s’isrobatòriu e sos moimentos terroristas “rujos”, arrimende sa teoria de s’atu criminale comente bia de autofinantziamentu.

Protzessos

In su 1973, sos criminosos fiant istados protzessados: a Rossi l’aiant cundennadu a sa presonia perpetuada, paris cun un’àteru membru de cabale cussideradu s’aporridore de s’operadura. Àteros 14 imputados aiant retzidu unu totale de 390 annos de regrusura. In mesu de sus castigados, bi fiant sos terroristas Giuseppe Battaglia, Renato Rinaldo e

Rinaldo Fiorani, onzi unu de sos cales fiant istadu cundennadu a trinta annos.

Dae sas imbestigaduras aiant imbrotadu finas su detenimentu, e sa cundenna a 12 annos, de Diego Vandelli, pro sa responsabilidade in su sechestru de Sergio Gadolla, rebuddu de una famìlia de imprendidores logales. In s’apellu, sa cundenna de s’aporridore fiat istada minimada, cando chi a Rossi l’aiant cunfirmadu sa perpetuidade.