To the Moon

Dae Wikipedia, s'entziclopedia lìbera.

Nùgoro-Istemma.png
Articulu in nugoresu
Nùgoro-Istemma.png

« Non lu apo mai nàtu a nèmmos, ma pèsso chi sas istèllas sìan faros. [...] Issos si pòden bìder, e chèren faeddàre. Ma non pòden, ca sun tropu attèsu pro intènder su chi si nàran. Tottu su chi pòden fàcher est a ammustràre sas lùches issòro... A issos e a mìe. »

To the Moon est su cuartu videojòcu de su cumponidore e designer canadesu Kan "Reives" Gao e sa prima produssione cummertziale de su grùstiu de isvilùpu suo, Freebird Games. Prubicàu in su mese de Sant'Andrìa de su 2011, est unu jocu fattu chin su programma RPG Maker XP engine, mancàri chi non sìat unu jocu de ruolu e si assimìzet de prus a una visual novel giapponesa. Su jocu lu at a prìmu lassàu in su zassu web suo, fràncu poi intràre in Steam e GOG dae su 2012 in sùsu. A To the Moon bi pòdet jocàre zente chi imprèat Windows, dae su 98 in sùsu, OSX e Linux.

Su jocu est tèntu in istìma meda e at collìu fìntzas premios, comènte su votu pro su mènzus indie (jocu fattu dae zente chi non tènet a palas sièndas mannas) RPG de su 2011.

Istòria[càmbia | edit source]

Semus in su benidòre. Duos dutores, Eva Rosalene and Neil Watts, sun impiegàos ind una siènda chi dèpet cumprìre s'urtimu disìzu de sos chi sun a puntu de sìche mòrrere, pro mèdiu de istrumèntos chi acòntzan sos ammèntos a manèra de fravicàre, in sa conca de su moribundu, un'attera realtàde chi menzus li pòdat dare pàsu in sos urtimos mamèntos de bida sua. Custa borta los cràman pro torràre impòsta a sa làstima de unu betzèddu chi est a còmmo in coma, Johnny Wyles: bolìat biazàre a pompiàre sa luna, ma nemmancu issu nd'ischìat su proìte de custu rimpiantu. Acò sos dutores sun custrìntos a brincàre, in intro de sos ammentos de Wyles, pro iscumbatàre dae ube ch'essìat custu disìzu. Tzentrale est s'atòbiu a minoreddu chind una pitzìnna chi a pùstis dìat bènner a muzère sua, River: pro si torràre a bìer, si promìtin de andare cònca a sa luna, pessànde a issa che sa màtta de unu cunìllu. Ma, pacu a pùstis, su tandu zovanu Wyles non l'ischìat chi frade suo fit pòstu in sutta de una macchina, ghiàda dae mama sua: issa, ammachiàndesi pro su dolore, appòrrit a su pitzinnu betabloccantes chi nèssi a issu li dìan evitare su trauma, ma li iscantzèllan pèri s'ammèntu de su passàu, e li mudat pessonalidade fachèndeche su frade iscumpàrtu. River, chi sùffrit de autismu a artu funtzionamentu, est mala a li torràre ammentu, gai còlat tottu sa bida chircànde, de bàdas, a li faveddàre de manera indiretta, fachènde unu muntòne tantu mannu de origami a forma de cunìllu de pàrrer unu firmamèntu. Wyles, arribànde fìntzas a betzèsa, mai at a cumprènder a muzère sua e, in s'impestàntu, li tòrrat a conca su disìzu de biazàre a sa luna. A costu de li bocàre s'ammentu de River, Eva Rosalene and Neil Watts resèssin in sa pùnna: River e Wyles si atòbian che cullegas de sa NASA e, mèntras chi in su bìsu de su moribundu sos duos si pòmpian a manu tenta càra a sa luna, su coro de Wyles si fìrmat pasànde in pache.

Aggantzos de fora[càmbia | edit source]