Toradora

Dae Wikipedia, s'entziclopedia lìbera.


Articulu in nugoresu

Toradora! (とらドラ! Toradora!) est unu contu nàschiu a su comintzu comente romanzu chi aiat iscrittu Yuyuko Takemiya, chin annantos disinnos de Yasu, e battìu a pustis, abberguau su sutzessu, ind'unu manga galu in cursu de isvilupu e ind un'anime de 25 episodios.

Su titulu Toradora! benit dae su lùmen de sos pessonazos printzipales, Taiga Aisaka e Ryūji Takasu. Taiga cheret nàrrer "Tiger" (tìghera) in sa manera chi sos giapponesos tenen de pronuntziare s'ingresu, sende in giapponesu "Tora" (虎?). Sa prima parte de su lùmen de Ryūji, "Ryū" (竜?), cheret narrer "iscurtòne" in giapponesu e sa trasliteradùra de sa paràgula ingresa est "Doragon" (ドラゴン?).

Istòria[modìfica | modìfica su còdighe de orìgine]

Sa istoria contat su rapportu chi su protagonista, Ryūji Takasu, tenet chin sos fedales suos in su secundu annu de iscola superiore. In genere sun dificurtosos meda, ca issu non pro curpa sua tenet particulares ocros dae sénde nàschiu: crìstas a susu e iride a sanpaku li dan unu isguardu e aspettu de pessone violenta e delincuente, mancari chi siat zentile e de bonu coro, gai chi si biet semper custrintu a ispiegare a sos ateros s'ecuivocu. De custa caratteristica Ryūji si nde fachet unu cumpressu malu a che sanare, ca de amicos non bi nd'at, francu unu (Yūsaku Kitamura) chi pro fortuna sichit a abbarrare in classe sua, e de pitzocas mancu a nde faveddare, mancari chi bi nde siat una chi li piachet (Minori Kushieda) ma chi non li at mai ammustrau sos sentimentos chi provat issu.

Una die Ryūji at modu de provocare, chenza nemmancu lu chérrere, a sa pitzocca prus connotta peri tottu s'iscola pro su carattere violentu e negativu chi tenet chin sa zente, Taiga Aisaka, tantu chi la muttin "tìghera palmare": issa est a s'imbesse de Ryūji, ca mentras issu pro s'aspettu fachet timòria a sos atteros sende zentile de carattere, issa de aspettu est bella e disizada ma de carattere fachet onore a su paralùmen suo. Taiga lu menispressiat sa prima vorta chi lu biet. Issu abberguat chi peroe est in amore chin su menzus amicu suo, Kitamura, e issa est sa menzus amica de sa pitzocca chi tantu bisat che amorada, Kushieda: goi fachen unu pattu, alliandesi pro facher a manera chi dontzunu si ponzat a pare chin sos chi lis piachen.

A pustis de unu muntone de provas, faddìas in tottu e pro tottu, in realtade sun Ryūji e Taiga a intender chi provan sentimentos s'unu pro s'attera, e diventan una coppia.