118 - Servìtziu de emerzèntzia sanidària

Dae Wikipedia, s'entziclopedia lìbera.
Jump to navigation Jump to search

Su 118 est su nùmeru telefònigu ativu in Itàlia pro sa dimanda de azutòriu mèdigu in su casu de emerzèntzia sanidària. Est unu nùmeru ùnigu nassionale, ativu sas 24 oras de sa die pro sete dies sa chida, de badas in totu su territòriu, dae telèfonos firmos e mòbiles.

Sos còdighes de prioridade

Onzi dimanda est tratada cunforme a un’ischema de còdighes de prioridade, peri sa tènniga de s’ischerriamentu. Su cumprimentu de sas dimandas non sighit s’òrdine tempurale de sas telefonadas, si nono chi dat urzèntzia prus manna a sas mutidas in ue s’arriscu pro s’interessadu est prus elevadu.

A onzi gradu de prioridade est assinnadu unu colore: Còdighe arbu: est su còdighe ch’identìfigat sos malistares de gravidades prus minore, chi podent esser resortos dae su meigu tratadore etotu. Custu còdighe est s’ùnigu suzetu a su pagamentu de su tichete. Còdighe birde: s’impreat cando non sunt cumpromìtidas sas funtziones bidales de su passiente. Sos còdighes birdes tìpigos sunt sas lesiadas minores, dolores o patolozias in ue su passiente mantenet s’istabilidade sua. Còdighe grogu: s’àprigat si sas cundissiones de su suzetu sunt in arriscu, e duncas su passiente no est istàbile. Sunt avesarmente còdighes grogos sas dificurtades respiratòrias, sas emorrazias, sas uscraduras de su duos grados no demasiadu istèrridas e sas lesiadas suspetas de òrganos internos. Còdighe ruju: custu ìnditat s’urzèntzia màssima. Su passiente tenet una o prus funtziones bidales cumpromìtidas, duncas est issiente o in arressada respiratòria o corotzirculatòria. Cunforme a deretivas noas, finas su dolore petorrale irradiadu in una pessone siente est cussideradu comente còdighe ruju comente infartu miocàrdigu suspetu. Còdighe nieddu: est cando su passiente, cun bida a s’ora de su carrigamentu a bordu de s’ambulàntzia, nche crompit obitadu a s’ispidale. Cunforme a sa leze, sas pessones zai obitadas a s’ora de s’azutòriu non podet esser trasportadas in s’ambulàntzia, sende custa sa tarea de s’impresa funerària de bussardu.