Jump to content

Assemblea Natzionale Sarda

Annanghe ligàmenes
Dae Wikipedia, s'entziclopedia lìbera.
Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Assemblea Natzionale Sarda
Fotografia de s'editzione 2025 de Fàulas, eventu natzionale de ANS
IncurtzaduraANS
Castaassòtziu culturale
Fundatzione2019
PunnaFàghere crèschere sa cussèntzia natzionale sarda
Àrea de atzioneSardigna
PresidenteRiccardo Pisu Maxia
Limbas ufitzialesSardu, Gadduresu, Tataresu, Saligheresu, Tabarchinu, Italianu
MotuChistionos, ideas e àndalas pro s'autodeterminatzione
Situ web
Manuale

S'Assemblea Natzionale Sarda (ANS) est un'assòtziu culturale sardu, nàschidu in su 2019[1][2] cun sa punna de agiudare a fàghere crèschere sa cussèntzia natzionale sarda.[1][3]

S'assòtziu est nàschidu su 10 de martzu de su 2019, a pustis de un'atòbiu de unas chentu persones in su Teatru de Iscanu[1], chi ant isseberadu de creare un'assòtziu apartìticu pro contribuire a fraigare sa cussèntzia natzionale sarda in totu sos sardos e a los torrare a acurtziare a sa cultura, a s'istòria, a sa geografia e a s'economia issoro.[3] A pustis, sunt nàschidas sas primas assembleas territoriales, chi dae tando organizant eventos medas issoro, e sunt incumintzadas sas atividades in totu sa Sardigna.

Dae su 2020, ant incumintzadu a organizare un'eventu mannu in Casteddu pro sa Die de sa Sardigna, pro nche la torrare a su significu originale suo e ammentare sos fatos e sos protagonistas de sa Rivolutzione Sarda.

In su 2021, est nàschidu S'Indipendente, unu blog abertu a sos contributos de sos membros ma fintzas de àteros voluntàrios chi bògiant frunire s’opinione issoro, pro una boghe prus lìbera e originale subra chistiones chi pertocant sa cultura, s’istòria, sa polìtica de sa Sardigna, s’autodeterminatzione de sos pòpulos, s’autoguvernu e àteros temas ismentigados a fitianu in sos mèdios sardos.[4] In su 2025, a pustis de annos de traballu e medas artìculos est divènnidu giornale, registradu in su Tribunale de Tàtari.[5]

In su 2022 est nàschidu Fàulas, su de duos eventos mannos de ANS, unu fèstival in Aristanis pensadu pro nche bortulare sos istereòtipos, sas fàulas, subra de sos sardos e de sa Sardigna[6][7][8], pro mèdiu de una sèrie de cunferèntzias, intervistas, mesas tundas e àteras medas cosas che a giogos, projetziones, bìsitas ghiadas, cuntzertos de mùsica e assàgiu de produtos e àteru galu.[9][6][10][11]

Semper in su 2022, sos eventos de Sa Die ant incumintzadu a incluire fintzas una bìsita a s'arcu de Palabanda, in Casteddu, su logu in ue sos rivolutzionàrios sardos ant isseberadu de organizare sa rebellia chi lis est costada sa bida. In su 2024 ant pedidu a su Comune de Casteddu de lu monumentalizare e de creare unu giardinu dedicadu a issos.[2]

In prus, semper in su 2024, ANS at incumintzadu at organizare eventos pro Sa Die fintzas in Tàtari, tzitade de importu mannu pro su sa rivolutzione sarda, collaborende cun àteros assòtzios pro medas atividades e fintzas agiudende s'initziativa pro unu monumentu dedicadu a sos rivolutzionàrios sardos.[12]

S'organizatzione de ANS est partzida in unos cantos òrganos chi traballant paris[1]:

  • S’Assemblea de is Sòtzios
  • Sas Assembleas Territoriales
  • Sas Assembleas Setoriales
  • Sos Grupos Operativos
  • Su Coordinamentu Natzionale

S'Assemblea de is Sòtzios, est s'ente chi permitit a totu sos sòtzios, pro mèdiu de su votu, de frunire su parre issoro e de regulare sa vida e su traballu de s’assòtziu.

Sas Assembleas Territoriales, chi podent èssere ligadas a una cale si siat àrea de sa Sardigna o finas de foras, faghent eventos e atividades polìticas e culturales pro difùndere sos valores de s’assòtziu e sustènnere sas punnas suas, interessende persones e fraighende retes, e sende duncas su ligàmene intra s'assòtziu e su territòriu.

Sas Assembleas Setoriales sunt trumas de chirca in campos diferentes, chi collàborant cun sas territoriales e sos àteras partes de s'assòtziu., ammaniende e sighende fintzas custas eventos e atividades de medas genias.

Sos Grupos Operativos s'òcupant de gestire atividades, e eventos ispetzìficos e àteras chistiones de importu chi pertocant a sas fainas de s'assòtziu.

Su Coordinamentu Natzionale, formadu dae Presidente, Vitzepresidente, Tesoreri e Referentes s'òcupat de coordinare e averguare su traballu de sas Assembleas e garantire chi sos valores de s’ANS e de sas lìneas detzisas in assemblea siant respetadas e sighidas dae totus.

  1. 1 2 3 4 (SC, SDN, IT) Chie semus, in Assemblea Natzionale Sarda. URL consultadu su 20 cabudanni 2025.
  2. 1 2 (IT) Assemblea Natzionale Sarda: "Riqualifichiamo Palabanda, ricordiamo gli eroi della Sarda Rivolutzione", in Il Manifesto Sardo, 1º santandria 2024. URL consultadu su 20 cabudanni 2025.
  3. 1 2 (IT) Lisa Ferreli, Assemblea Natzionale Sarda, e la coscienza di un popolo che vuole raccontarsi senza fàulas | Sardegna che cambia | Italia che cambia, in italiachecambia.org, 18 cabudanni 2025. URL consultadu su 20 cabudanni 2025.
  4. ↑ (SC, SDN, SDC, CA, LIJ, IT) A si podet? Naschet S’Indipendente, in S'Indipendente, ANS - Assemblea Natzionale Sarda, 15 ghennàrgiu 2021. URL consultadu su 20 cabudanni 2025.
  5. ↑ (SC, SDN, SDC, CA, LIJ, IT) A si podet? S'Indipendente essit giornale, in S'Indipendente, ANS - Assemblea Natzionale Sarda, 13 làmpadas 2025. URL consultadu su 20 cabudanni 2025.
  6. 1 2 (IT) Fàulas, in Assemblea Natzionale Sarda, 13 làmpadas 2023. URL consultadu su 20 cabudanni 2025.
  7. ↑ T.C, Su fèstival chi nde istrumat sos logos comunos de sos sardos, in Istòrias, 1º nadale 2022. URL consultadu su 20 cabudanni 2025.
  8. ↑ Torrat Fàulas, su fèstival de Ans, in Il Minuto. URL consultadu su 20 cabudanni 2025.
  9. ↑ Fàulas, in Aristas su festival contra is logos comunes de sa Sardigna, in Istòrias, 6 cabudanni 2025. URL consultadu su 20 cabudanni 2025.
  10. ↑ (IT) Marianna Guarna, A Oristano torna Fàulas, il festival che ribalta i luoghi comuni della Sardegna, in L'Unione Sarda, 5 santugaine 2023. URL consultadu su 20 cabudanni 2025.
  11. ↑ (IT) A Oristano c’è Fàulas per cancellare i falsi miti sulla Sardegna, in La Nuova Sardegna. URL consultadu su 20 cabudanni 2025.
  12. ↑ (IT) Sa Die a Sassari: svelato il monumento ai Rivoluzionari Sardi - Assemblea Natzionale Sarda, in assembleasarda.org, 1º maju 2024. URL consultadu su 20 cabudanni 2025.
Bogadu dae "https://sc.wikipedia.org/w/index.php?title=Assemblea_Natzionale_Sarda&oldid=187379"