Cani de lepuri sardu

Dae Wikipedia, s'entziclopedia lìbera.
(Reindiritzadu dae Cane lepperinu sardu)


Articulu in nugoresu

Su cane leperinu, cane curridore o cani de lepuri sardu est una ratza de cane de sa Sardinna de mannesa mediana perfetu pro sa catza, chi nde at fatu in sos seculos unu cane resistente meda. Est lanzu, lestru e musculosu.

S'artesa mediana, tucande dae s'armu, andat dae sos 60 a sos 70 chentimetros pro unos 17-25 kg. Sa conca est longa e minore, chind unu murru longu belle su dopiu de cantu est longa sa cherbeddera, tenet ocros mannos e nare a punta. Sas dentes sunt isvilupadas, chin caninos acutados meda (cosa chi est comuna fintzas pro sas ateras ratzas tipicas de sa Sardinna). Su pilu est belle nudda o curtzu meda, modde a lu tangher, e podet tenner colore de s'arena, chi si istimat meda, ma fintzas nigheddu, arbu o tigradu in murinu (custu colore fachet picare a su cane su nomine "trighinu" in biddas comente Gavoi). Fisicamente si assimizat meda a sos canes de lepure chi impreàbant sos egìtzios.

Pro more de su fatu chi sos sardos lu impreàbant pro catzare, tenet un'istintu enorme; mancari chi, si bene pesàu dae su mere, si cumportet bene, su caratere suo est indipendente e a s'ispissu agreste.

No est una ratza de cane reconnota e, sende chi bi nd'at non prus de una chentina de esemplares peri tottu sa Sardinna, depet parare fronte a su periculu seriu chi podat iscumpàrrer in intro de pacu tempus.

Aggantzos de fora[modìfica | modìfica su còdighe de orìgine]