Continuidade territoriale
logudoresa. Abbàida sas àteras bariedades gràficas:
campidanesu · LSC · nugoresu
Cun su tèrmine continuidade territoriale s’ìnditant sos istrumentos lezistrativos chi tenent sa finalidade de garantire sos servìtzios de trasportu a sos tzitadinos chi bivint in reziones isbantazadas de sa nassione a sa cale pertenent, est a narrer de afortire sa coesione intre sas diferentes arzolas de un’Istadu, superende isbantazos relassionados cun sa largania, s’insizibilidade o sa dificurtade de atzessu issoro, che in su casu de incraves o iscraves. Pratigamente, custu printzìpiu cunsistit in unu sistema de azudos o istruturas aprovisionadas dae s’Istadu a sos tzitadinos e a sas entidades rezionales pertocadas.
Una caraterìstiga fundamentale de sa continuidade territoriale est sa base normativa comente Servìtziu Pùbrigu, chi faghet possìbile dèrogare a sos printzìpios de mercadu lìberu e de concurrèntzia lìbera, in manera chi sos trasportos siant utilizàbiles independentemente dae sa rentabilidade efetiva chi su trasportadore podet lograre.
Si faeddat de continuidade territoriale finas cando, mancari cun unu mecanismu distintu, su servìtziu est cumbidadu deretamente dae impresas pùbrigas.
Sas reziones urtraperifèrigas de s’Unione Europea e de sos paìsos e territòrios de urtramare de sos Istados membros de s’Unione Europea podent benefissiare de sas disponiduras naradas.