Dark Souls II

Articulu in nugoresu

« Go beyond death »

« Bàe ùltres sa morte »

Dark Souls II (ダークソウル II Dāku Souru Tsū?) est unu videojocu de rolu (action RPG), sichidore de Dark Souls, chi From Software at isvilupau e at prubicau Namco Bandai Games. Est istau presentau in su Spike Video Game Awards 2012 e an irvelau chi at a tenner un'istoria differente dae su jocu chi lu at pretzédiu, un'ambientassione nova e unu novu protagonista. Su jocu s'at a prubicare pro PlayStation 3, Xbox 360 e Microsoft Windows in su mese de Martzu de su 2014.

Istòria

A pùstis de unu bìdeo chi b'at a intràda a ammustràre su disispèru de chie sa non morte at corfiu, su protagonista bènit trazàu a un'atteru mundu chi si nàrat Drangleic, in ube atòbiat ind una pinnètta sas urtimas bardìanas de su focu. Custas lu pìcan in zìru, nàndeli chi sìche at a mòrrer unu muntone de bortas e chi at a bènner, comènte a tottus sos atteros, unu essere bòidu e ispozàu de resòne e sentìdu. Andànde a innàntis còlat a Majula, unu biddizòlu in ube sa figura misteriòsa de su Mìssu de s'Ismeràlda li dimàndat si est issu chi at a picàre su tronu: custa li nàt chi dèpet collìre battor animas mannas, prima de bìer a su re de su locu, Vendrick. Fàttu custu, biàzat a su casteddu de Drangleic in ube, ind una losa profùnda, b'est su chi pacu bi abbàrrat de Vendrick, bènniu comomài bòidu. S'aneddu chi peròe si atzàpat in sa bestimènta antica sua permìttit a su protagonista de lòmper a su santuarju de s'iscurtòne, in ube at a fàcher connoschèntzia de unu iscurtòne anticu chi li dàet unu ozèttu pro biazàre a su chi si ammèntat de sa gherra contr'a sos zigàntes. Su protagonista bìnchet su segnore issoro e, torràu a sa sede regale, si atòbiat chin sa reìna Nashandra, chi a s'accàbbu de tottu est s'inimicu berdadèru de tottu su jocu. Pùstis de la àer bìnta, su protagonista bènit a re novu finìnde sepurtàu galu vivu in intro de sa cripta.

Gameplay

Dark Souls II tenet una jocabilidade chi si assimizat meda a cussa de su primu capitulu; de s'ateru, su co-direttore Tomohiro Shibuya at decrarau chi non cheret cambiare sos cumandos. Atzapamus in intro de sas novidades imbetzes unu mundu de esplorare unu pacu prus mannu, una grafica e animassiones ammezoradas grassias a su motore graficu novu, una zestione de frunimentu prus profunda, sa possibilidade de impreare duas armas a su matessi tempus, una menzus intellighentzia artifitziale de sos inimicos, novas armas e armaduras e carchi amezoramentu in sa modalidade multijocadore online.