F-Droid

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

F-Droid
Logotipu
Ischermada de esèmpiu
Isvilupadore(es)	Ciaran Gultnieks
Data prima versione	29 cabudanni 2010
Ùrtima versione	1.17.0 (22 trìulas 2023)
Sistema operativu	Android, Replicant e Linux
Limbàgiu	Python, PHP e Java
Litzèntzia	GNU Affero General Public License, version 3.0 or later
Situ web	f-droid.org

F-Droid est unu catàlogu de aplicatziones lìberas pro Android, realizadu dae unu programma ala cliente e un'ala serbidore, ambos suta de litzèntzia lìbera (GNU GPLv3+ e GNU AGPL).

Caraterìsticas

Su cliente F-Droid, chi naschet de unu adatamentu de Aptoide, agregat su catàlogu de sas aplicatziones interroghende a manera periòdica sos depòsitos de software (repositories) cunfigurados. Che a depòsitu predefinidu b'est su depòsitu ufitziale de su progetu, gestidu dae sa comunidade de F-Droid, chi cuntenet petzi programmas lìberos.

Sas caraterìsticas chi sighint, elencadas in òrdine alfabèticu, distinghent F-Droid dae Google Play.

Anonimadu

Pro atzèdere a su catàlogu F-Droid bastat a installare su cliente, chene netzessidade de cale si siat forma de registratzione.

Catàlogu non in lìnia

S'elencu e sos detàllios de sas aplicatziones a disponimentu sunt sarvados subra de su dispositivu, cunsentende de isfogiare su catàlogu fintzas chene una connessione a Ìnternet.

Comunidade e isvilupu

Sos impitadores de F-Droid sunt invitados a pigare parte in manera ativa a s'istùdiu e a s'isvilupu de sas aplicatziones sìngulas, chi totus tenent iscritu in manera crara: comente si pònnere in cuntatu cun chie mantenet su software, comente sinnalare ideas o problemas, comente fàghere donatziones e suta cale litzèntzia lìbera sunt distribuidas.

Cumpartzidura

Cada aplicatzione si podet cumpartzire pro mèdiu de Bluetooth o cun sa funtzionalidade Imbia aplicatziones, chi permitit de publicare sas aplicatziones pròpias in sa rete locale impreende su Wi-Fi. Su cumpartzimentu acontesset in manera legale gràtzias a sa litzèntzia lìbera de sas aplicatziones.

Annotos subra de funtzionalidades contierradas

Sende chi su còdighe de orìgine de totu sas aplicatziones est semper a disponimentu, sa comunidade est in gradu de fàghere a manera chi F-Droid avertat a primu s'impitadore si una aplicatzione cuntenet publitzidade o si si basat subra servìtzios de rete non lìberos o subra de programmas propietàrios (e duncas si diat pòdere acumprire fainas non disigiadas chi non si potzant averguare). Custas funtzionalidades, a parusu no agradèssidas, sunt mutidas anti-funtzionalidades (dae anti-features in limba inglesa). S'installatzione de sas aplicatziones cun custas caraterìsticas est possìbile su matessi, bastat chi sa presèntzia issoro siat sinnalada in manera crara in antis de s'installatzione.

Retro-cumpatibilidade e collàudos isperimentales

De cada aplicatzione est possìbile a iscarrigare siat s'ùrtima versione chi sas versiones pretzedentes, pro cunsentire torradas a dae segus de versione. Unas cantas de custas versiones podent èssere sinnadas che a isperimentales pro èssere intregadas cun punnas de collàudu e pustis sinnadas comente istàbiles. Semper pro punnas de collàudu est fintzas possìbile installare aplicatziones chi, in manera teòrica, non sunt suportadas dae su dispositivu pròpiu de s'utente pro farta de unas cantas caraterìsticas, che a esèmpiu su tocu mùltiplu o sos permissos de raighina.

Seguridade

Totu sas aplicatziones in ue sa versione tenet s'eticheta source sunt istadas compiladas a manera direta partende dae su còdighe de orìgine. Custu bolet nàrrere chi su còdighe de orìgine sinnaladu est funtzionat in manera efetiva e chi non sunt istadas insertadas anti-funtzionalidade in su momentu intre cumpiladura e distributzione (cosa chi diat pòdere, in càmbiu, acontèssere pro aplicatziones a còdighe abertu chi sunt in Google Play, ue s'aplicatzione est compilada e carrigada a banda de s'isvilupadore e diat pòdere duncas non currispòndere a su còdighe de orìgine propostu). Est possìbile notare chi s'aplicatzione F-Droid est issa matessi in s'elencu de sas aplicatziones a disponimentu de F-Droid e subit sos agiornamentos che a una cale si chi siat àtera aplicatzione in F-Droid.

Progetu

Su depòsitu de F-Droid cuntenet unu nùmeru semper de aplicatziones chi sighit a crèschere totora (prus de 3.530 in su trìulas de su 2021). Su progetu est partzidu in:

• un'aplicatzione cliente pro chircare, iscarrigare, agiornare e averguare sas aplicatziones Android de unu depòsitu de F-Droid;
• fdroidserver, unu traste pro gestire e creare depòsitos noos;
• un interfache visìbile (front end) deWordPress pro sos depòsitos.

Sas aplicatziones de F-Droid sunt compiladas partende dae còdighe de orìgine a disponimentu in manera lìbera e a litzèntzia lìbera. Su progetu est gestidu dae voluntàrios e non tenet perunu protzessu formale de atzetatzione pro sas aplicatzione. Siat sos isvilupadores chi sos impreadores podent crèschere su catàlogu de aplicatziones de F-Droid in manera lìbera. Sa mancàntzia de còdighe propietàriu est s'ùnicu recuisitu pedidu a sas aplicatziones in su catàlogu de F-Droid.

Su cliente

Butone "Iscàrriga·lu dae F-Droid"

S'aplicatzione cliente de F-Droid non si podet incluire in su catàlogu de Google Play ca custu ùrtimu vietat sa publicatzione de aplicatziones chi li faghent cuncurrèntzia. Pro custu motivu, paris a su de evitare de impreare su catàlogu de Google, chi est cumpostu de aplicatziones propietàrias, su cliente F-Droid est publicadu petzi a su de foras de issu, in particulare subra de su sitiadu web ufitziale.

F-Droid respetat sa riservadesa de sos utentes: non arrastat nen issos nen sos dispositivos issoro. Pro pòdere impreare su cliente no est netzessàriu a tènnere unu contu, e custu no imbiat a su serbidore perunu datu identificativu chi non siat su nùmeru de versione.

Su cliente est progetadu pro èssere resistente a su bardiamentu, a sa tzensura e a sas connessiones ìnternet chene afidabilidade. Pro favorire s'anonimadu, suportat sos serbidores intermediàrios HTTP e sos depòsitos acasagiados subra de servìtzios Tor (The Onion Router). Sos dispositivos clientes podent funtzionare comente a "butegas de aplicatziones" estemporàneas, intreghende sas aplicatziones iscarrigadas a àteros dispositivos pro mèdiu de Wi-Fi locale, Bluetooth e Android Beam.

Esistint fintzas aplicatziones clientes alternativas, che a Aurora Droid o NeoStore, chi si podent iscarrigare dae F-Droid matessi (dae s'aplicatzione o fintzas dae su situ) e chi, dae chi permitint de impostare una limba personalizada, sunt a disponimentu fintzas in sardu.

Ligàmenes esternos

• (EN) Situ ufitziale, in f-droid.org. URL consultadu su 5 santugaine 2022.
• (EN) F-Droid, in Free Software Directory. URL consultadu su 5 santugaine 2022 (archiviadu dae s'url originale su 5 santugaine 2022).
• (EN) Interfache pro F-Droid, in Fossdroid: Free and open source Android apps. URL consultadu su 5 santugaine 2022.