Hyper Text Coffee Pot Control Protocol

Dae Wikipedia, s'entziclopedia lìbera.
Custu artìculu est iscritu in sa grafia campidanesa. Abbàida sas àteras bariedades gràficas:

logudoresu · LSC · nugoresu

Posta in òpera irònica de su protocollu

Hyper Text Coffee Pot Control Protocol (HTCPCP) est unu protocollu de arretza po su controllu, su compudu e sa dianniòstica de cafeteras. Est spetzificada in sa RFC 2324 e publicada comenti brulla su 1 de abrili 1998.[1][2] Su 1 de abrili 2014 anti amanniau su protocollu cun sa RFC 7168, incluendi su suportu a is tejeras.

Protocollu[modìfica | modìfica su còdighe de orìgine]

Sa RFC 2324 dd'at scrita Larry Masinter comenti sàtira, narendi chi "teniat una punna sèria – identificàt medas de is maneras cun chi HTTP est stètiu amanniau in manera impròpia".[3] Su linguàgiu impreau fiat perou irònicu: po esempru, una fràsia narat "there is a strong, dark, rich requirement for a protocol designed espressoly [sic] for the brewing of coffee" ("ddoi at una netzessidadi forti, scura e arrica de unu protocollu progetau a manera espresso [sic] po s'infusioni de su cafei").

Mancai s'orìgini sua fessit una brulla, su protocollu at tentu spraxidura in lìnia. S'editori de testu Emacs ddu ponit in òpera una versioni ladu-clienti chi funtzionat dessintotu[4] e unas cantu arrelatas de bug inditant sa farta de suportu po su protocollu in Mozilla.[5] Dexi annus apustis de sa publicatzioni de sa RFC, su Web-Controlled Coffee Consortium (WC3) at publicau una primu botza de s'HTCPCP Vocabulary in RDF[6], parodia de s'HTTP Vocabulary in RDF publicau de su World Wide Web Consortium (W3C)[7].

Su 1 abrili 2014 ant publicau sa RFC 7168, chi sterrit su protocollu po suportai in manera prena fintzas is tejeras.[8]

Cumandus e arrespustas[modìfica | modìfica su còdighe de orìgine]

HTCPCP est un'estensioni de su protocollu HTTP. Is pedidas HTCPCP funt identificadas cun su schema URI coffee (o sa tradutzioni in una de is 29 lìnguas suportadas) e agiungit cancu mètodu:

BREW o POST Pedit a su serbidori HTCPCP de preparai su cafei. S'impreu de POST a po custa operatzioni est deprecau. Ant propostu un'intestada noa HTTP "Accept-Additions", po suportai agiuntas a preferèntzia comenti crema, lati, vanìllia, lamponi, whisky, acuardenti etc.
GET Arricit su cafei de su serbidori HTCPCP.
PROPFIND Arrecùperat is meta-datus apitzus de su cafei.
WHEN Pedit a su serbidori HTCPCP de acabai de ghetai lati in su cafei.

Su protocollu definit fintzas duus stadus de faddina:

406 Not Acceptable Su serbidori HTCPCP po càncua arraxoni no podit fruniri s'agiunta pedida a su cafei, e s'arrespusta iat a depi indicai una lista de agiuntas a disponimentu. In sa RFC si narat chi "in sa pràtica, cafeteras automàticas medas no podint fruniri agiuntas."
418 I'm a teapot Su serbidori HTCPCP est una tejera, e no podit preparai su cafei.[9] Chi sa cafetera no podit preparai su cafei sceti po su momentu, iat a depi torrai invecis unu còdixi 503.[10] Sa versioni de Google de sa pàgina de faddina 418 narat chi "The requested entity body is short and stout. Tip me over and pour me out.", cun riferimentu a sa cantzoni I'm a Little Teapot.[11]

Movimentu "Save 418"[modìfica | modìfica su còdighe de orìgine]

Su 5 austu 2017, Mark Nottingham, presidenti de su grupu de traballu HTTPBIS IETF, at pediu de bogai su còdixi de stadu 418 "I'm a teapot" de sa prataforma Node.js. Sa dii apustis, Nottingham at pediu chi is riferimentus a 418 "I'm a teapot" fessint bogaus de su linguàgiu de programatzioni Go e apustis de Python e de sa libreria HttpAbstractions de ASP.NET.

Arrespundendi, su svilupadori de 15 annus Shane Brunswick at creau unu situ web, save418.com, e at fundau su movimentu "Save 418 Movement", narendi chi is riferimentus a 418 "I'm a teapot" in unus cantu progetus funt "unu promemòria chi is processus asuta de is elaboradoris funt ancora fatus de umanus" ("a reminder that the underlying processes of computers are still made by humans")[12]. Su situ de Brunswick est bessiu virali me is oras apustis de sa publicatzioni, arregollendi millas de upvotes in s'arretza sotziali Reddit, e provochendi s'impreu de massa de s'hashtag Twitter #save418 introdùsiu de Brunswick etotu in su situ de su movimentu.

Faendi atentzioni a sa chèscia pùblica, Node.js, Go, Python's Requests e sa libreria HttpAbstractions de ASP.NET ant decìdiu de no nci bogai 418 "I'm a teapot" de is progetus insoru[13][14][15][16].

Riferimentus[modìfica | modìfica su còdighe de orìgine]

  1. ↑ (EN) Larry M. Masinter, Hyper Text Coffee Pot Control Protocol (HTCPCP/1.0), RFC 2324, Internet Engineering Task Force, 1º abrile 1998. URL consultadu su 1º nadale 2021.
  2. ↑ (EN) Laura DeNardis, Protocol Politics: The Globalization of Internet Governance, MIT Press, 30 settembre 2009, pp. 27ff, ISBN 978-0-262-04257-4.
  3. ↑ (EN) Larry Masinter, IETF RFCs, in larry.masinter.net.
  4. ↑ (EN) Downloads -=- Eric Marsden, in emarsden.chez.com. URL consultadu su 1º nadale 2021.
  5. ↑ (EN) 46647 - (coffeehandler) Joke: HTCPCP not supported (RFC2324), in bugzilla.mozilla.org. URL consultadu su 1º nadale 2021.
  6. ↑ (EN) HTCPCP Vocabulary in RDF, in canada.esat.kuleuven.be. URL consultadu su 1º nadale 2021 (archiviadu dae s'url originale su 29 ghennàrgiu 2010).
  7. ↑ (EN) HTTP Vocabulary in RDF 1.0, in www.w3.org. URL consultadu su 1º nadale 2021.
  8. ↑ (EN) Imran Nazar, The Hyper Text Coffee Pot Control Protocol for Tea Efflux Appliances (HTCPCP-TEA), RFC 7168, Internet Engineering Task Force, 1º abrile 2014. URL consultadu su 1º nadale 2021.
  9. ↑ (EN) A Goblin Teasmade teamaker with an implementation of Error 418, in qdh.org.uk. URL consultadu su 2 settembre 2015 (archiviadu dae s'url originale su 6 nadale 2014).
  10. ↑ (EN) Imran Nazar, The Hyper Text Coffee Pot Control Protocol for Tea Efflux Appliances (HTCPCP-TEA), RFC 7168, Internet Engineering Task Force, 1º abrile 2014. URL consultadu su 1º nadale 2021.
  11. ↑ (EN) Error 418 (I'm a teapot)!?, in google.com.
  12. ↑ (EN) Save Error Code 418, in save418.com. URL consultadu su 1º nadale 2021.
  13. ↑ (EN) 418 I'm A Teapot · Issue #14644 · nodejs/node, in GitHub. URL consultadu su 1º nadale 2021.
  14. ↑ (EN) 418 I'm a Teapot · Issue #915 · aspnet/HttpAbstractions, in GitHub. URL consultadu su 1º nadale 2021.
  15. ↑ (EN) 418 I'm a Teapot · Issue #4238 · psf/requests, in GitHub. URL consultadu su 1º nadale 2021.
  16. ↑ (EN) The Go Programming Language, Go, 1º nadale 2021. URL consultadu su 1º nadale 2021.

Pàginas ligadas[modìfica | modìfica su còdighe de orìgine]

Bogadu dae "https://sc.wikipedia.org/w/index.php?title=Hyper_Text_Coffee_Pot_Control_Protocol&oldid=180124"