Limba ainu

Articulu in nugoresu

Sa limba ainu (in ainu アイヌ イタク, aynu itak; in giapponesa アイヌ語, ainu-go) est una limba chistionada dae su grupu etnicu europoide de sos Ainu in s'isula de Hokkaidō, a nord de su Giappone. Tempus fachet si faveddabat fìntzas in sas isulas Curili, in sa parte nord de Honshu, e in sa meitade meridionale de Sakhalin.

S'ainu est una limba isulada chene rapportos chin sas atteras limbas. A bortas che la ponen in su grùstiu de sas limbas paleosiberianas, ma custu est unu faveddu chi cumprendet medas familias limbisticas minores e isuladas chi b'aìat in Siberia innàntis de s'artziada de etnias turcas e tungusas; de cada manera, no est una familia limbistica. In medas creden chi s'ainu siat currelau a su giapponesu e a sas limbas altaicas (Patrie 1982). Dae pacu tempus s'at provau a che la pònner a pare chin sas limbas austronesianas, pro mèdiu de cumparàntzias curturales e lessicales, comente nat su limbista giapponesu Shichiro Murayama. B'at fintzas sa proposta de chie la cheret sorre de s'indoeuropeu, ca b'an atzapàu unas 200 paragulas de possibile orizine a comunu e carchi assimìzu sistematicu.

A commo, s'ainu est una limba chi sich'est morinde. Difattis, pèri tottu s'isula de Hokkaidō b'at pètzi 100 pessones chi galu la faveddan, e custas sun in sa bidda de Nibutani e tenen prus de trint'annos; mancari tottu, s'interessu de la torrare a imparare dae parte de sa zente de su locu chi non la connoschet prus est vivu.