Gavinu Còntene

Articulu in logudoresu

	« S'omine cantadore 'e mestieri, -narat su diciu- morit pedidore, ma eo lu fattu pro solu capriciu, pruite dae me matessi lu so idende »
	(dae una littera de tiu Gavinu Contene a su poete de Tresnuraghes tiu Pitanu Morette chi s'agataiat confinadu in Bugerru)

Gavinu Contene cun sa divisa de sas Guardias regias, in s'annu chi si fit arruoladu (1875)

Gavinu Còntene (Siligo, 12 de nadale 1855 – Siligo, 27 de trìulas 1915) est istadu unu poete sardu.

Sa domo de tiu Gavinu Còntene in Siligo

Tiu Gavinu Contene (Gavino Luciano Contini) fit naschidu in Siligo su 12 'e nadale de su 1855, in d'una domitta (chi est ancora intrea) in sa parte pius antiga de sa idda in sa zona 'e “su Runaghe”, ed e' mortu su 27 de triulas de su 1915. Est istadu forzis su poete de gala pius mannu de Sardigna, de seguru su pius bene cherfidu. Fidi istimadu meda dae sos collegas chi lu jamaiana: "de sos poetas su mastru", "su zigante" e "altu monte". Sunu memorabiles sas disputas chi haiat cun tiu Zuseppe Pirastru e tiu Antoni Cubeddu, cun Barore Testone, Pitanu Morette, tia Maria Farina e Antonandria Cucca. Pagu prima de morrer in su 1915, ada iscrittu 22 ottavas (in ottava rima serrada) chi fini istatas pubbricadas in Tàtari in su 1929 cun su titulu: Discursu de Gavinu Contini et sa morte chi benit a l'avvisare essende arrivada s'ora sua. Su poete immaginat de faeddare cun sa Morte e con Deus. In sa 18ma ottava su poete saludat sa idda sua e si augurat de resessere, cun s'ajudu de sos santos e de sa Madonna, a si salvare s'anima, e a sa fine Deu lu assolvet e issu lu ringraziat. A parte custu cumponimentu e calchi littera (in rima), comente pro tottus sos poetes cantadores che a isse, sa mazore parte de sa produzione est bistada tramandata grazie a sos appassionados chi haian sighidu sas garas e chi si las ammentaiana. In d'ogni casu de tiu Gavinu sun istadas pubricadas duas antologias contivizadas dae duos silighesos, sa prima in sos annos 60 dae Antoni Carta e s'attera in su 1983 dae don Giommaria Dettori. Bisonza de tennere in contu chi sas ottavas, tramandadas a memoria de omine, bortas meda sunu diversas una dae s'attera e a bortas non semus mancu seguros de s'attributzione de zertas ottavas.

Wikisource

Category:Poesias de Gavinu Contene

Poesias

GAVINU CONTENE e SERAFINU PINNA DE THIESI

• Serefinu Pinna:
  

Silighesos ponidebos in luttu
chi su caddu famadu contad molstu,
a currer in thiesi l'hana postu
e colcorija manna si c'ha juttu
sa sorre lu pianghed a succùttu
nende: "a frade meu chie l'ha molstu?"
Naradebilu: Chie ha molstu a GAVINU
e su jamadu Pinna Serefinu!

• Tiu Gavinu:
  

Cagliadi Serafinu mattimannu
o tue puru ti contas poeta?
Si ti ponzo in s'imbiligu un iscetta
mantenese a thiesi a binu un annu;
caglìàdi e bae nende "Ite dannu! in thiesi falàda è sa saetta..."
Su lampu chi ha colpidu a serefinu
fid su lampu de Contene Gavinu!
Atera versione:
Cagliadi Serafinu mattimannu
ello tue puru ti contas poeta?
Su inu ja lu buffas chena ingannu
e mancu sutta 'e pes ti che lu etta'
Si ti ponzo in s'imbiligu un iscetta
mantenese a Thiesi a binu un annu;
e si ti ponzo un'iscetta in renes
a Thiesi un annu a binu mantenes

Cullegamentos dae fora

• Notas subra tiu Gavinu Còntene de Paolo Pillonca
• Calchi poesia iscabula
• Una testimoniantzia de su 1909 de Stanis Manca
• Elenco de raccoltas de poesias de tiu Gavinu