Tumba de sos zigantes

Articulu in nugoresu

Tumba de su gigante de sa Ena de Thomes, in Durgali.

Sas tùmbas o lòsas de sos gigàntes (connotas in carchi logu fintzas comente domos de s'ocru) sunt monumentos funeràrios de interru colletivu frabicados in epoca nuraghesa e presentes peri totu s'ìsula de Sardigna.

Che a sos nuraghes, custas costrutziones megalìticas non tenent egualdade in su continente europeu intreu e sunt fatos a pranta retangulare cun losas de pedra manna posta a terra.

Istrutura

Tumba de su gigante de Is Concias, in Cuartùciu.

Sas tumbas sunt unu aposentu mortuàriu chi est intra de unos 5 e 15 metros de larghesa e unu o duos metros de artària. Sa parte in cara de s'istrutura nche la inserrant a intro de un'ispètzia de semitzìrculu, chi fìnghet sos corros de unu trau, e una losa prus antica in su tzentru de custu semitzìrculu cun una abertura prus minore meda, dae ube si intraiat.

Impare a s'apertura bi aìat unu betile chi, fòrtzis, fachiat a sìmbulu a dèos o a sos mannos anticos chi fint a bàrdia de sos mortos.

Funtzione

Sas tumbas de sos gigantes fiant logos a in ue, in epoca nuraghesa, sos sardos interraiant a sos mortos issoro. Fiant a largu dae su tzentru populadu e podìant mantenner intra de sos chèntu e treschentos mortos.

Sos chi faghiant parte de sa tribù, clan o bidda, andaiant a in cue a aporrire omàju a sos mortos de sa comunidade, chena de distintziòne de classe o privilégiu de sorta perunu. Podet esser, chi sos mortos fiant iscarrados, est a narrer chi ddis bogaiant sa carre a in antis de s'interru (b'at evidèntzia in sos ossos, chi cunsigiant a custa teoria), e fiant interrados cando su nùmeru cumintzaiat a èsser tropu mannu.