Nicaràgua

Artìculu in LSC

Posidura de su Nicaràgua in s'Amèrica Tzentrale

Bandera de su Nicaràgua

Su Nicaràgua, uffitzialmente Repùblica de Nicaràgua (in ispagnolu: República de Nicaragua [reˈpuβlika ðe nikaˈɾaɣwa]) est su prus istèrridu istadu in s'istmu tzentru-americanu. Sa capitale est Manàgua.

Geografia

S'istadu tenet istèrrida de 130.375 km2 e populatzione de prus de 6 milliones. Etnicamente est cumpostu pro su 65% de ammesturados, pro su 17% de biancos, pro su 9% de nieddos e pro su 5% de indìgenos. Sa limba uffitziale est s'ispagnolu, ma is tribùs nadias chi bivent in s'estu chistionant is limbas issoro.

Allàcanat cun s'Honduras in su norti e cun su Costa Rica in su sud, in s'estu tenet bessida in su mare Caraìbicu e in s'uestu in s'ocèanu patzìficu. S'istadu istat intre su de 11 e su de 14 grados a nosti de s'ecuadore, s'agatat duncas intregamente in sa zona tropicale.

Geograficamente podet èssere partzidu in tre zonas printzipales: is basciuras de Patzìficu, is campedas tzentrales e is basciuras caraìbicas. In su chirru a cara de su Patzìficu s'agatant is duos lagos prus mannos de s'Amèrica Tzentrale: su lagu Manàgua e su lagu Nicaràgua. S'ecosistema biològicu de su Nicaragua est ricu e disvariadu. In su territòriu si podent agatare vulcanos ativos.

Istòria

S'impèriu Ispagnolu at cunchistadu sa regione in su sèculu de 16. Su Nicaràgua at pois balangiadu s'indipendèntzia in su 1821. De s'indipendèntzia, s'istadu est passadu atraessu perìodos de ambìssias polìticas, ditaturas e crises fiscales, chi intre is annos 60 e 70 de su '900 ant betidu a sa rivolutzione. Oe su Nicaràgua est una repùblica rapresentativa democràtica, cun istabilidade polìtica e in crèschida econòmica.

Economia

Su Nicaràgua est unu de is istados prus poburos de is Amèricas: agiommai s'80% de sa populatzione si bivet cun prus pagu de 2 dollaros a die.