Ludwig (mortores seriales)

Dae Wikipedia, s'entziclopedia lìbera.
Jump to navigation Jump to search

Marco Furlan (Pàdua, 16 ghennarzu 1960) e Wolfgang Abel (Düsseldorf, 25 de martzu de 1959) sunt duos mortores seriales chi aiant cumìtidu mortorzos in su nordu-estu de s'Itàlia continentale, in Alemània e in Olanda intre su 25 de austu de 1977 e su 7 de ghennarzu de 1984, rebindighende sos crìmines issoro cun boladoreddos nounatzistas sinzados cun su marcu Ludwig.

Caraterìsticas de sos mortores[modìfica | modìfica su còdighe de orìgine]

S'aspetu chi aiat còrfidu de prus s'opinione pùbriga a s'ora de su detenimentu de sos membros de su grupu “Ludwig” fiat istada s'orìzine sotziale de Furlan e Abel, fizos de sa burghesia arta de Berona e aproghilados dae su bighinadu de Borgo Trento, unu de sos prus prestizosos de sa tzitade.

Marcu Furlan fiat fizu de su deretore de su tzentru de uscrados de s'Ispidale Tzivile Mazore de Berona – sintomàtigu est su fatu chi meda de sas bìtimas de “Ludwig” fiant istadas brusiadas bias – e, a s'ora de su detenimentu, fiat a probe de s'indutorare in matèrias fìsigas inche s'Universidade de Pàdua.

Wolfgang Abel fiat fizu de unu cussizeri delegadu de una cumpanzia de asseguràntzias alemanna e istaiat in Negrar, una bidda de su de Berona, peroe in su tempus coladu aiat bìvidu in Mònagu de Bavària puru. Aiat logradu unu diproma de dutore in matèrias matemàrigas cun notas màssimas e traballaiat cun babu suo in sa matessi cumpanzia de asseguràntzias.

Ambos formaiant parte de unu grupu chi, a sos tempos, teniant s'avesu de s'addoviare in sa pratza Vittorio Veneto de Borgo Trento. Cumpartziant s'idea de innetare su mundu dae disamparados, omossessuales, drogudependidores, preìderos cun s'ùniga curpa de aer cumìtidu pecados in sa zoventura, gasi etotu che dae discutegas e tzines a lughes rujas.

Sos mortorzos[modìfica | modìfica su còdighe de orìgine]

Su primu mortorzu realizadu dae sos duos remontat a su 25 de austu de 1977, addaghi Guerrino Spinello su senadomo fiat istadu brusiadu in sa Fiat 126 sua in Berona.

Su 17 de nadale de 1978, prus de un'annu a pustis de su primu mortorzu, fiat istadu ochìidu Luciano Stefanato su camareri, un'omosessuale, assassinadu cun prus de 30 istocadas e agatadu cun sas duas atzas galu infertas in s'ischina, in Pàdua. Belle un'annu prus a tardu, in Benètzia, fiat istadu ochìidu cun unas trinta istocadas Claudio Costa, unu drogudependidore de 22 annos.

Posteriormente, sa croba de mortores seriales aiat ochìidu in su 1980 a Alice Maria Baretta sa prostituta antiga cun corfos de istrale e marteddu. Su 25 de santandria de su matessi annu, ambos aiant rebindigadu pro sa prima bia cussos crìmines cun su nùmene de Ludwig, imbiende una lìtera a “Il Gazzettino” de Berona. Fiant istados finas acusados de aer postu fogu, su 25 de maju de 1.981, a sa turrighedda de Porta San Giorgio in Berona, un'istrutura minore abandonada chi faghiat parte de sas fortifigaduras austrìagas bezas, devènnida un'istranzadorzu de iscaminados e senadomo. In sa pira fiat mortu Luca Martinotti su deghesetarzu, chi fiat barighende sa note in ie cun un'àteru amigu, abarradu fertu in manera grae. Pro custu crìmine fiant istados assòrvidos. Resurtat sa lìtera de rebindigadura de su fogu a “La Repubblica”.

Su 20 de triulas de 1982, aiant ochìidu padre Gabriele Pigato e padre Gabriele Lovato, ambos monzos de setanta annos de su Santuàriu de Nostra Sennora de Monte Berico in Bissèntzia. Sos duos monzos fiant passizende in via Cialdini (una carrera chi òrizat sos muros de sa domo zeneralìtzia), addaghi fiant istados assartados a corfos de marteddu dae ambos zòvanos. Padre Gabriele fiat mortu deretu, cando chi padre Giuseppe fiat abarradu anguniende in su solu; l'aiant trasportadu a s'ispidale San Bortolo, peroe onzi tentativu de lu sarvare fiat istadu inùtile. Su 26 de frearzu de 1983, aiant ochìidu in Trentu donnu Armando Bison su satzerdote, chi fiat istadu agatadu cun unu puntaboru infertu in sa carrotza, cun unu santucristu apicadu.

Su 1 de martzu de 1983, aiant postu fogu a su tzine a lughe rujas Eros de Milanu, in ue fiant mortas ses pessones e trintaduas fiant arreadas fertas. Una de sas bìtimas mortales, Livio Ceresoli de 46 annos, fiat unu meigu chi non s'agataiat in su tzine e chi bi fiat intradu pro azutoriare, abarrende leadu in petus dae sas framas: aiat retzidu sa medalla de oro a sa memòria pro sa balentia tzivile. Sos duos aiant fatu torra sas faìnas issoro su 17 de cabudanni de 1983, causende 13 mortos in sa pira de su crube sessuale “Casa Rossa” de Amesterdamu.

S'8 de ghennarzu de 1984, aiant tragadu unu fogu a discutega “Liverpool” de Mònagu; in sa pira fiat morta una pessone (una camarera de orìzine italiana chi traballaiat in s'istabilimentu) e àteras sete fiant abarradas fertas; in su boladoreddu de rebindigadura fiat iscritu “In su Liverpool non si coddat prus!”.

Urtimu atacu e cassa[modìfica | modìfica su còdighe de orìgine]

Su 4 de martzu de 1984, ambos si nche fiant zutu a sa discutega Melamara de Castiglione delle Stiviere in su de Màntua, in ue s'agataiant batorchentos piseddos, su prus caratzados pro sa festa de carrasegare. In unu mamentu de cunfusione, unu de sos duos, disfrassadu a Pierrot, aiat fatu intrare s'àteru a sa discutega, abrende-li un'essida de seguràntzia. Fiant penetrados a s'istabilimentu batende duas bussas chi cunteniant duas canistras de benzina. Mesucuados in unu cuzone iscuru, aiant cumintzadu a betare benzina a sa mocheta e l'aiant impiradu, sena tenner in contu chi sos istabilimentos pùbrigos si fiant dèvidu probider de rebestimentos in materiales contrafogos, a pustis de sa pira de su tzine Statuto, acontèssida in Turinu in su frearzu de su 1983.

Pro custa resone, sa mocheta aiat leadu fogu in manera istremamente lenta, dende a un'incarrigadu de sa seguràntzia su tempus de intervenner. Addaghi si fiant bidos iscobertos, sos duos aiant proadu a atacare su bogadore pro poder leare sa fua, peroe aiant agabadu pro tenner su peus e fiant istados intregados a sa polima, chi los aiat sarvadu dae su tentativu de lintzamentu dae bandas de sos borrochianos de sa discutega. Ludwig aiat duncas cuncruìdu s'istela sua de morte dassende-si in palas 28 mortos e 39 fertos.

Acontessidas giuditziàrias[modìfica | modìfica su còdighe de orìgine]

Abel fiat istadu sutapostu a unu peritamentu sichiàtrigu, dimandadu finas dae sos defendidores de Furlan, Piero Longo e Niccolò Ghedini. Furlan si negaiat a si sutaponner a sos cullòchios. Balloni e Reggiani sos ispetzialistas aiant atrogadu chi Abel teniat una capatzidade lmitada de produer resonamentos in tempus de sos mortorzos, in prus de custu aiant rapresentadu chi Abel fiat crèschidu sena sos atentos afetivos chi permitint de fraigare una pessonalidade sana. Su peritamentu fiat istadu meda cuntierradu.

Su 10 de frearzu de 1987, ambos fiant istados cundennados a trinta annos de presone, cando chi s'abogadu zenerale aiat dimandadu sa presonia perpetuada pro sos duos; in prus de custu, fiat istadu recunnotu a ambos unu defetu mentale partiale.

Su 15 de làmpadas de 1988, sa Corte de Apellu de Benètzia aiat ispresonadu sos duos pro ispiradura de sos tempos de impresonamentu e aiat cumandadu a Furlan s'abarrada obrigada in Casale di Scodosia, una bidda de su de Pàdua, dae ue Furlan si nche fiat fuìdu in su maju de su 1991, pagu ora in antis de sa cundenna definitiva in sa cassadura. L'aiant atzapadu in su maju de 1995 in Creta, in ue biviat suta de unu nùmene farsu e fiat istadu batidu torra a Itàlia; intre tempus, su 10 de abrile de 1990, sa Corte de Apellu de Benètzia, presìdida dae Nicola Lercano, l'aiat cundennadu in rebellia a 27 annos de presone, e sa cundenna fiat istada cunfirmada s'11 de frearzu de 1991 dae sa Corte de Cassadura; in sa matessi ocasione, finas Abel fiat istadu cundennadu a 27 annos. Pagu ora a pustis de su detenimentu, Marco Furlan aiat proadu a si suitzidare in presone, chirchende de s'inforcare a sas istancas cun unu lentolu.

Bogadura de presone[modìfica | modìfica su còdighe de orìgine]

Su 18 de abrile de 2008, aiant ispainadu sa noa de sa detzisura de su Tribunale de bizilàntzia de Milanu de cunfiare a Marco Furlan in proa a sos servìtzios sotziales. Furlan, peri su legalista suo, Corrado Limentani s'abogadu milanesu, aiat pèdidu de poder dassare su penadorzu a de die pro bi torrare a de note e in sos agabos de chida. Belle gasi, s'organismu zudissiàriu aiat detzìdidu de non li cuntzeder su rezìmene abertu, si nono prus a prestu su cunfiamentu a sos servìtzios sotziales, tenende in contu su cumportamentu bonu de su mortore seriale e s'agabu de pena oramài crompidore, prebidu pro su cumintzu de su 2009.

Sa noa narada aiat trubadu bastante surpresa e disaproamentu in s'opinione pùbriga, e numerosas protestas in custu contu nche fiant cròmpidas a diàrios e chidàrios. Su 24 de abrile de 2008, Furlan at logradu su de duos dipromas suos de dutore, summa cun laude, in inzineria informàtiga. Su 12 de santandria de 2010, a Furlan l'aiant alliberadu in fatu de su cumportamentu suo positivu in tempus de sa liberdade bizilada.