S'abasatu de s'Heysel

Custu artìculu est iscritu in sa grafia logudoresa. Abbàida sas àteras bariedades gràficas:

campidanesu · LSC · nugoresu

S’abasatu de s’Heysel est una trazèdia acontèssida su mèrcuris 29 de maju de 1985 in s’istàdiu Heysel de Brussellas, pagu ora in antis de su cumintzu de sa finale de sa Cupa de Campiones de fùbalu intre sa sotziedade italiana de sa Juventus e s’ingresa de su Liverpool, in ue fiant mortas 39 pessones, chi 32 fiant italianas, e nde fiant abarradas fertas addae de 600. In mesu de sas bìtimas bi fiant finas tres sardos: Giuanni Casula, unu casteddarzu de 43 annos, fizu suo Andria, che nde teniat petzi 10 e zogaiat in sos puddighinos de su Casteddu, e Màriu Spanu, de 41 annos, peifughesu apostivigadu dae 20 annos in Noara.

Su massacru fiat istadu causadu dae sa biolèntzia pratigada dae unos cantos reziradores de su Liverpool, che dae su setore X aiant carrigadu sos ispetadores de su setore Y, chi su bonu fiant italianos, costituidos mescamente dae famìlias e pessones tranchillas.

In sa carcadripa manna chi si fiat formada, argunos si fiant fulliados a su bòidu pro evitare de arreare ischerfados, àteros aiant proadu a iscaddigare sos ostàculos e intrare a su setore serente, àteros galu si fiant fertos contra a sas tancaduras. Su muru aiat agabadu pro s’istrampare pro neghe de su pesu etzessivu e numerosas pessones fiant abarradas ischerfadas, abatigadas dae sa turma e ochìidas currende chirru a una bia de essida, pro medas representada dae unu zumbadorzu abertu chirru a su terrinu de zogu.

In fatu de sa trazèdia, si fiat detzìdidu de zogare su matessi sa partida: sa detzisura l’ant leada sas fortzas de seguràntzia berzianas e sos ghiadores de s’UEFA petzi pro resones de òrdine pùbrigu, cun sa finalidade de evitare tensos annanghedores, mancari sa Juventus àeret dimandadu a su cumintzu de no zogare. A pustis de s’appellu leìdu dae Neal e Scirea sos cabitanos de sas duas echipas, s’addòviu fiat printzipiadu a sas noe e baranta de sa sero, cun un’ora e bintichimbe minutos de atardamentu. Sa partida fiat terminada cun su resurtadu de 1-0 pro sa Juventus, devènnida campiona de Europa pro sa prima bia in s’istòria sua.

Sa neghe de s’intzidente fiat istada atribuìda a sos partidàrios de su Liverpool, peroe finas a sa betzesa de s’Heysel e a sa farta de organizadura dae bandas de sas autoridades berzianas.

Su protzessu fiat terminadu in su 1.991 cun sas cundennas a bator annos de presonia e a 60.000 francos berzianos de machìtzia pro noe atzolocados, e a chimbe annos de presonia pro àteros tres. Fiant istadas cunfirmadas finas sas cundennas pro Albert Roosens su segredàriu de sa Federadura berziana de fùbalu e pro Johann Mathieu su cabu de sa polima de tando.

Sas echipas ingresas fiant istadas iscrùdidas dae sas porfias europeas pro chimbe annos, su Liverpool pro tres annos de prus, a pustis minimados a unu.