Sa Mama 'e su Sole

Articulu in nugoresu

Sa Mama de su Sole fit un'essere chi sos mannos ponìan in sa conca de sos pitzinnos in assustu, cando non cherìan andare a si corcare in su bortaedìe de istìù (chi b'aiat troppu basca). Fit una bellissima femina chi passizabat peri sas istradas in istiu: si sa Mama 'e su Sole s'imbenìat ind unu pitzinnu jocande, e chi duncas no aiat postu mente a sos mannos suos, issa lu pessichìat currende finas a cando non lu picabat e, guastandelìa, li lassabat unu sinzu a conca: tando su pitzinnu aìat dèpiu jùchere una frèba arta (nada finas calentùra) chi li durabat carchi die.

Tra paristòria e realtade

Custa paristoria fit connotta in cada bidda peri tottu sa Sardigna. Pro impedire a sos pitzinnos de essire dae domo cando b'aiat tropu basca, e duncas chin s'arriscu de si picare unu còrfu de sole, si aìat imbentàu custu pessonàzu, finas pro ispiegare su fenomenu de sa freba. Pro custu sos pitzinnos, chi a intendere custos contos si assuconàban e tenìan timòria de sa Mama 'e su Sole, a sa fine isseperàban de fàcher a bonos e siche abbarràban in domo finas a cando s'aera troppu caènte non siche fit andada.

In prus de sa Mama 'e su Sole ebìa

In carchi bidda, in prus de sa Mama 'e su Sole, si contat chi b'aìat finas sa Mama 'e su Frittu pro s'istajòne de ibèrru, sa Mama 'e su Fogu pro ispiegare a sos pitzinnos su fenomenu de sos focos, e sa Mama 'e su Bentu chi cumparìat cando tiràbat su bentu maestru o sa tramuntana.