The Postman Always Rings Twice

Sa prima editzione (1934)

The Postman Always Rings Twice (Su posteri sonat semper duas bias) est unu romanzu de James M. Cain pubrigadu in su 1934.

Su libru est istadu bortadu in bintises limbas, peroe galu nono in sardu.

Inredu

Narradu in sa prima persona, su romanzu si fogalizat in s’atopu intre Frank Chambers, bagamundu e abentureri profissionale, cròmpidu una die a sa “Taberna de sos duos Chircos”, e Cora, sa muzere de su mere de s’istabilimentu, una fèmina a sa sensualidade istrampadora. Issa s’abizat luego de sas miradas de Frank, chi detzidit de atzetare su traballu de azuadore in sa taberna chi l’est cumbidadu. Sos duos devenint amadores e protzetant de ochier su maridu de Cora, unu gregu a nùmene Papadakis, a s’assempru repellidore, chi est còrfidu a sa conca dae sa muzeri in s’ìnteri chi s’agatat in sa bantzera. Sende gasi, su maridu, mancari siat fertu a sa conca, non morit. A cussu puntu, Frank s’allargat dae su logu bidende chi sa fèmina, leada dae s’impudu, at renuntziadu a s’intentu de dassare maridu suo.

A pustis de unu tempus curtu in ue Frank releat sos tràfigos suos de zogadore de bonaura, impèllidu dae s’atraidura fatale chirru a Cora, detzidit de la torrare a bider. Si realluet s’apentu intre sos duos, chi torrant a protzetare su mortorzu, finas ca su gregu cheret assolutamente unu fizu dae Cora, chi a su contràriu no nde tenet peruna gana. Custa bia su mortorzu tenet èsitu, finas ca, pro mera casualidade, Frank non morit a bia sua in intro de s’automòbile in ue ant simuladu un’intzidente, e sos duos curpàbiles s’agatant assòrvidos e in libertade gràssias a un’abogadu togu e a sas manipuladuras ispertas de sas cumpanzias de asseguràntzia.

Frank e Cora, meda marcados dae sas acontèssidas chi ant tentu infruèntzia negativa a subra de sa relassione issoro, si separant pro unu tempus curtu, ca sa fèmina devet currer a ue mama sua, chi est malaida in manera grae. Intre tempus, Frank tenet un’acapiadura breve e intzidentale, in lìnea cun sa natura sua de perdulàriu chi preferit a biver in sa carrera prus a prestu chi andare in fatu a un’istilu de bida burghesu, e pro custu est critigadu prus bias dae Cora. A pustis de una crisis agravada dae minetzas fortes, detzidint de torrare paris, peroe s’impudu los turmentat e los ponet s’unu contra a s’àtera, belle chi s’assimizu mannu intre sos duos e su desizu issoro de si cojuare e tenner unu pitzinnu los cònchinet a bincher sos cuntrastos issoro. Peroe su cuncruimentu est dramàtigu: Cora morit in un’intzidente in antis de s’illierare e Frank, che est resèssidu a subrabiver, custa bia est acusadu de mortorzu – mancari non siat crara sa curpabilidade sua – e lu cundennant a morte. Belle gasi, Frank, in s’oru de sa pèntuma, s’aferrat disisperadamente a s’amore bìvidu e pedit un’arresa pro sese e pro sa fèmina chi at amadu, amat galu e ispera poder agatare torra luego.