Wikipedia:Pàgina de is provas

Dae Wikipedia, s'entziclopedia lìbera.
In custa pàgina podes fàghere totu is provas chi cheres!

SIENTZIA E DIGITALE - 51[modìfica su còdighe de orìgine]

Unos cantos sientziados sardos ant iscobertu s’ereditariedade de su sistema immunitàriu. Su sistema immunitàriu, narant sos sientziados, est una retza de tzèllulas, tramas e òrganos chi traballant paris pro gherrare contra a sos agentes patògenos. Su nùmeru de sas tzellulas immunes est importante a beru pro su funtzionamentu de su sistema immunitàriu e pro sa salude nostra, ma no est craru si custu dipendet petzi dae sa reatzione a sas infetziones o si b’intrant finas sos fatores genèticos. S’istùdiu l’ant publicadu in sas revistas Cell e Science. Su grustu de istudiosos ghiados dae Frantziscu Cucca, diretore de s’Istitutu de chirca genètica e biomèdica de su Consiglio nazionale delle ricerche (Irgb-Cnr) e professore de Genètica mèdica de s’Universidade de Tàtari, at mustradu chi sa genètica tenet una parte fundamentale in sa regulatzione de sos livellos inghiriaditzos de sas tzèllulas de su sistema immunitàriu. «Sa finalidade de s’istùdiu est a cumprendere si e in cale mesura sas tzèllulas inghiriaditzas de su sistema immune sunt eredadas pro lìnia familiare e cales genes sunt interessados», narat Serena Sanna, istudiosa de s’Irgb-Cnr chi at coordinadu sas anàlisis istatìsticas. «Sos resurtados de su traballu ant mustradu chi sos livellos de sas tzèllulas tenent una base ereditària manna e, a cunfirma de custa tesi, sunt istados identificados tretos medas de su genoma umanu interessados dae custa regulatzione genètica». Su grustu de istudiosos at analizadu sa parte chi tenent sos genes in sa regulatzione de sos livellos de unos chentu tipos tzellulares diferentes cun un’istùdiu de assotziamentu fatu in unu totale de 2.870 indivìduos chi beniant dae bator biddas de Sardigna e chi faghiant parte de su progetu ProgeNIA/SardiNIA, chi istùdiat sas bases genèticas de prus de 800 paràmetros de importu biomèdicu. In custu istùdiu, in prus, su profilu genèticu individuale l’ant esaminadu cun unu gradu de risolutzione chi finas a como non bi nd’aiat àpidu àteros, gràtzias a su secuentziamentu de su genoma intreu de sugetos medas interessados dae s’istùdiu. «Amus identificadu 23 variantes genèticas indipendentes assotziadas a tzèllulas immunitàrias particulares, pro su prus noas, mancari calicuna esseret istada giai proposta in àteros istùdios ma sena una significatividade istatìstica forte», agiunghet Maristella Steri, esperta de istatìstica in su Irgb-Cnr. Sos istudiosos, pustis, ant cunfrontadu sos resurtados cun sos datos chi b’at in sas bases de datos pùblicas, e ant iscobertu chi, a bortas, custos genes fiant giai assotziados a tzeliachia e a maladias autoimmunes comente sa colite ultzerosa, sa diabete de tipu 1, s’isclerosi mùltipla, s’artrite reumatòide. Istùdios anteriores de s’Irgb-Cnr, in intro de su progetu ProgeNIA/SardiNIA, ant identificadu genes assotziados a s’artària de sas pessones, a sa glitzemia, a su colesterolu, a sos lìpidos emàticos e a paràmetros ematòlogicos comente s’emoglobina fetale. «Sos sardos – narat Cucca – rapresentant una populatzione ideale pro sos istùdios de genètica, cun resurtados chi a s’ispissu tenent unu balore prus generale pro su restu de s’umanidade: in custu casu, su de cumprèndere comente sa genètica règulat su sistema immunitàriu e s’autoimmunidade nos acùrtziat a s’isvilupu de terapias noas e prus profetosas pro su tratamentu de patologias autoimmunes».

Ligàmene: http://lanuovasardegna.gelocal.it/regione/2013/09/27/news/scoperta-sarda-il-sistema-immunitario-ha-una-base-ereditaria-1.7819724