ZN414

Custu artìculu est iscritu cun sa grafia

Limba Sarda Comuna

. Abbàida sas àteras bariedades gràficas:

Su ZN414 est unu tzircùitu integradu baratu de Ràdiu AM. Presentadu in su 1972, su cumponente est istadu progetadu e frunidu dae Ferranti e produidu in lissèntzia dae GEC-Plessey. Su ZN414 fiat populare intre is costruidores amatoriales, ca una ràdiu AM cumpleta podiat èssere fata cun solu una pariga de cumponentes esternos, un'auriculare a cristallu e una bateria de 1,5 V.

Su tzircùitu ZN414 originale de Ferranti fiat frunidu in unu corpus de transistores TO-18 de 3 cuntatos, mentres sa versione de GEC e is de Ferranti bènnidas a pustis (ZN414Z) ant impreadu su TO-92 de plàstica. Is variantes ulteriores, sa ZN415 e sa ZN416, teniant corpus DIL de 8 cuntatos e includiant un'amplificadore integradu chi faghiat a ddoe acapiare in manera direta auricolares o altoparlanteddas.

Su tzircùitu de ràdiu a intro de su ZN414 est basadu in unu progetu connotu comente Ràdiu-frecuèntzia acordada (TRF, Tuned Radio Frequency). Su progetu de TRF est meda prus simpre de su tzircùitu de ràdiu supereterodina, meda prus impreadu ma prus cumplessu. Est s'impreu de su tzircùitu TRF chi prus de totu permitit de montare agiumai totu una ràdiu in unu corpus a tres cuntatos.

ZN414 in su tzircùitu funtzionale de base

Su protzessu de produtzione de su chip ZN414 at impreadu una tècnica ancora noa pro su tempus, connota comente a Isulamentu pro difusione de colletore (CDI, Collector Diffusion Isolation). Sa CDI dd'ant imbentada ingennieris de is Laboratòrios Bell Telephone e, a pustis, Ferranti dd'at isvilupada comente a protzessu cummertziale in Su Rennu Unidu^[1].

Sa famìlia originale ZN41x non est in produtzione dae ora, ma sunt a disponimentu ecuivalentes modernos de su ZN414 originale a 3 cuntatos, cun còdighes MK484, TA7642 e (prus che totu in Ìndia, Estràfrica e Australàsia) YS414 e LMF501T.

Rendimentu

Su lìmite superiore de operatzione est de unos 3 MHz e pro custu non faghet a dd'impreare pro una ràdiu a undas curtzas. In ònnia manera, podet èssere impreadu comente amplificadore de mèdia frecuèntzia. Progetos medas publicados in Internet impreant unu SA612 comente oscilladore / mixer locale e su ZN414 / TA7642. Su controllu automàticu de su balàngiu est aplicadu dae sa resistèntzia dae s'essida a s'estremidade “terrestre” de sa bobina de intrada. Su balàngiu de base est impostadu dae sa resistèntzia de càrrigu. Su consumu de currente est aici bassu chi faghet a impreare unu LED ruju de 1,8 V comente a reguladore de tensione dae baterias de 3 V o dae un'alimentatzione de 5 V.

Riferimentos

↑ (EN) International Conference, in www.jsme.or.jp. URL consultadu s'8 ghennàrgiu 2026.

Ligàmenes esternos

[1] (EN) International Conference, in www.jsme.or.jp. URL consultadu s'8 ghennàrgiu 2026.

[1]