Abioportu de S'Alighera

Dae Wikipedia, s'entziclopedia lìbera.

Coordinatas: 40°37′52″N 8°17′19″E / 40.631111°N 8.288611°E40.631111; 8.288611 S’abioportu de S’Alighera-Fertìlia “Costera de su Coraddu” (IATA: AHO, ICAO: LIEA) est una infraistrutura de sa Sardinna posta in sas probianias de Fertìlia, a su nordu de S’Alighera. S’abioportu s’agatat in sa zona meriesa de sa Nurra, unu paris de sa zona nordu-otzidentale de s’ìsula.

Est chistione de un’istrutura aberta a su tràfigu de lìnia nassionale e internassionale, cun una capatzidade annuale de unos 3.500.000 passizeris, e est probida de un’osservadorzu meteorolòzigu. In su 2.011, est istadu su de 20 abioportos de Itàlia pro nùmeru de passizeris. Su 30 de martzu de 2.009, in prus de custu, est devènnidu sa de bator bases operativas italianas de sa cumpanzia irlandesa Ryanair, chi aunit s’abioportu cun diferentes destinos nassionales e europeos.

Su transitadorzu fiat istadu inaguradu in su martzu de su 1.938 comente abioportu militare, peroe fiat istadu in tempus de sa segunda gherra mundiale chi l’aiant dotadu de sa prima pista bera, longa 700 m. e in terra luzana. In sos annos posteriores a sa gherra, sa pista fiat istada illonghiada e mezorada, in sa matessi manera de sas bias de rodadura.

In tempus de sos primos annos sessanta fiat istadu fraigadu un’angaru chi teniat funtzione de istassione abiàtiga pro sos bolos tziviles, peroe su primu terminale de passizeris beru remontat a su 1.968. A sa metade de sos annos setanta, sa pista fiat istada batida a sos 3.000 metros atuales.

In su 1.980, sa cumpanzia Alitalia aiat istituìdu inche s’abioportu s’Iscola de bolu de S’Alighera, crèschida peri sos annos finas a su màssimu de su 1.994 de sessanta incarrigados e garantende sa formadura de chentu pilotos s’annu, parallelamente cun sa diversifigadura de sas atividades in abiotaxis e manutenturas. Dae su 2.001, Alitalia at redimensionadu su cumparis a 25 impreados, e su 20 de martzu de 2.003 at comunicadu ufissiarmente su tancamentu de s’iscola.