Giogos olìmpicos

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Logotipu de su comitadu olìmpicu

Sos Giogos olìmpicos de s'era moderna sunt un'eventu isportivu fatu cada bator annos chi previdet sa cumpetitzione intre sos mègius atletas de su mundu in belle totu sas disciplinas isportivas praticadas in sos chimbe continentes abitados.

Sos giogos, fintzas si los mutint fatu-fatu fintzas Olimpìades, non sunt de confùndere cun s'Olimpìade: custa ùrtima inditat s'intervallu de tempus de bator annos chi colat intre un'editzione de sos Giogos olìmpicos e sa sutzessiva. Pro custu, mancari sos Giogos de su 1916, 1940 e 1944 non los apant fatos, s'est sighidu a contare sas Olimpìades, gasi chi sos Giogos de Parigi 2024 nde sunt istados sa de trintaduos editziones.

Su nùmene Giogos olìmpicos l'ant isseberadu pro ammentare sos Giogos olìmpicos antigos chi si faghiant in sa Grètzia Antiga, in onore de sos deos in sa tzitade de Olìmpia. Su barone Pierre de Coubertin, a sa fine de su de XIX sèculos, aiat tentu s'idea de organizare giogos sìmiles a sos de sa Grètzia antiga, e duncas aia impedidu a su sessu femininu, ma subra de custu puntu non l'aiant ascurtadu. Sas primas Olimpìades de s'era moderna las ant fatas in Atene in su 1896. Partende dae su 1924, ant istituidu fintzas Giogos olìmpicos ispetzìficos pro sos isport ierriles. In prus, esistent fintzas sas Paralimpìades, cumpetitziones intre persones isentas. Dae su 1994 s'editzione ierrile non si tenet prus in su matessi annu de cudda istiale, ma a distàntzia de duos annos.

Sa bandera olìmpica rafigurat chimbe aneddos intritzidos in campu biancu, chi simbulègiant sos chimbe continentes. Sos colores seberados sunt presentes in sas banderas de totu sas natziones.

Sas règulas e sas lìnias de ghia pro s'organizatzione de sos giogos olìmpicos, chi incluent comente depet èssere su sìmbulu de sas Olimpìades, cale depet èssere sa bandera e su motu, sunt cuntènnidos in sa Carta Olìmpica, unu documentu ufitziale formadu dae 6 capìtulos e 61 paràgrafos, in ue s'ispiegant sos balores de su Movimentu olìmpicu e comente a si tzèlebrant, s'ammàniant e s'amministrant sos giogos olìmpicos.