Educatzione

Dae Wikipedia, s'entziclopedia lìbera.

Nùgoro-Istemma.png
Articulu in nugoresu
Nùgoro-Istemma.png

Tzentru finlandesu pro s'educatzione e sa salude de sos mannos.

Sa educatzione est s'attividade, chi sas curturas poden cambiare in su tempus, chi est pro s'isvilupu de sas connoschentzias e facultades sotziales e proprias de una pessone.

Picande in analisi sa radichina etimologica, su faveddu benit dae su latinu educĕre (est a narrer "bocare a campu" o "bocare a fora su chi bi at in intro"), paragula cumposta dae ē- ("dae", "foras dae") e dūcĕre ("jucher", "ghiare", "battire"). Sicunda de atteros, benit dae s'atteru verbu latinu educare ("pesare" in su sentidu de imparare a unu pitzinnu comente si depet istare in su mundu).

Sa paragula de "educatzione" a s'ispissu si ponet a pare chin cussa de "imparu", mancari chi s'urtima cherjat inditare una tecnica chi punnat a "trasmitter" sapidorìa. Mancari chi sas istrategias istitutzionales podan esser parte de unu prozettu educativu, su significu de "educatzione" est prus largu e bolet narrer, prusaprestu, a nde bocare a fora una calidade o cumpetentzia chi galu non tenet manera de si esprimer a massimu.

Eppuru, mancari chi s'etimologia niet su beru, bi at galu cunfusione meda a pizu de sa paragula. In medas curturas, "educada" est una pessone chi sichit normas sotziales (péri non iscrittas) de manera curreta; in atteras, comente in cussa anglosassone, narrer education est su matessi de boler narrer "imparu". Su chi est tzertu, de cada manera, est chi sos duos significos (unu chi pertoccat una pessone ischìa e s'atteru chi pertoccat su cumportamentu chi tenet) sun a curtzu meda, mancari chi non si los depat cunfunder.

Bi at tres tipos de educatzione: cussa formale, cussa non formale e cussa informale. Su primu campu de su ischire chi at istudiàu sos problemas a pizu de s'educatzione fit sa pedagogia, chi zirat in tundu de s'educatzione de sos piseddos. Pac'ora est naschia sa dissiplina de sas issentzias de s'educatzione e de sa formatzione, chi pertoccan fintzas s'edade a mannu, fachènde de sa paragula "formatzione" su matessi de "educatzione".