Sindrome de Asperger

Dae Wikipedia, s'entziclopedia lìbera.
Bae a: navigadura, chirca

Nùgoro-Istemma.png
Articulu in nugoresu
Nùgoro-Istemma.png

Sos aspies (comente si mùttin in amistade sos chi sùffrin de sa sindrome) a s'ispìssu ammùstran interèssu mannu pro cosas particulares.

Sa sindrome de Asperger (incurtziàda in SA) est unu istròbu pervasivu de s'isvilùpu tèntu in cussìderu comente una forma de autismu a artu funtzionamentu. Su favèddu lu at imbentàu sa psichiatra inglesa Lorna Wing ind unu papèri medicu de su 1981: at dàu custu lùmen a sa sindrome in ammèntu de Hans Asperger, unu psichiatra e pediatra austriacu chi non si at bìdu reconnòttu su traballu fìntzas a sos annos Novanta. Sos chi pàtin custa sindrome sun cumpromìssos a libellu de cuntattu e comunicassione sotziale, tènen ischèmas istereotipàos de interèssos e cosa itte fàcher, in prus de pùnnas pro sas cales bi pòden colare tottu sa bida. Cuffòrma s'autismu classicu, s'isvilùpu cognitivu e de su limbàzu non b'est a tardu.

Carchi sintomu de sa sindrome, chi s'etziologia sua est misconnòtta, est a communu chin s'istròbu de impàru non-verbale (nonverbal learning disorder), sa fobia sotziale e s'istròbu ischitzòide de pessonalidade. Sa sindrome de Asperger non si diagnòsticat pètzi pro sas caratteristicas chi li pertènen, ma fìntzas pro unu muntòne de atteros problemas chi a issa pòden esser currelàdas, comente sa depressione, s'ansia e s'istròbu ossessivu-compulsivu.