Àpara
Artìculu in LSC
S'Àpara (Allium triquetrum L.) est un'erba de sa famìlia de sas Liliàceas (o Amaryllidaceae segundu sa classificatzione APG), chi creschet in totus sas regiones mediterràneas.
S'agatat a curtzu a su mare e fintzas in is montes finas a 600 mt. Pro crèschere bene cheret umbra e abba meda.
Sas cambas e sas fògias sunt a forma triangulare, lùghidas in colore birde iscuru e podent arribbare a 45 cm. Is frores pende-pende a forma de campaneddas sunt biancos cun una liniedda birde in mesu a is pètalos. Cumentzat a frorire in su mese de martzu e si sicat in maju. Est famosu su ditzu de "si nche falare che s'àpara in su mese de maju".
Est una genia de àgiu agreste chi s'agatat in totus is sartos de Sardigna e dd'impreaiant meda pro coghinare. Est bona meda in su minestrone o frissa cun s'ou.