Assòtziu sardu "Gràssia Deledda" - Parma

S'assòtziu sardu "Gràssia Deledda" est una sodalia sarda faghende parte de sa FASI chi est formada mescamente dae sardos disterrados a Parma e a fùrriu, peroe finas dae bastantes logales interessados a sa Sardinna e a sa curtura sua, chi tenet sa sea in sa bidda emiliana in s'aderetu de Strada Baganzola nr. 7, ubigada in sa prima periferia parmesa, in sa zona nordu-otzidentale de sa bidda. S'assòtziu est istranzadu in intro de unu dominarieddu cun duas prantas in colore grogu, ch'istranzat finas sa sea de una partzidura perifèriga de s'ABIS. S'assòtziu "Gràssia Deledda" s'agatat a pee pranu e est cumpostu dae unu tzillereddu, una sala manna, una bibriutega minore e una coghina. Faghent unos doighi annos chi s'assòtziu s'agatat inoghe: in antis fiat in viale Piacenza, a inghìriu de unu chilòmetru de distàntzia, prus chirru a su tzentru. Su presidente de s'assòtziu est Antoni Gonàriu Pirisi, unu sichiàtrigu sarulesu chi zai dae annos est aposentadu in continente. Ateros membros de cabale sunt Paschedda Pira, Lisandru Cartzedda, Sarvadore Marche, Zosepe Mesina, Urzeni Cau, gasi comente Miale Santu Pedru su limbista. S'assòtziu est meda ativu in s'afortimentu de sa limba e de sa curtura sardas, e amàniat fitianu eventos de zenia bariada. Pro su chi pertocat sas oras de funtzionamentu, sa sodalia est normarmente aberta sos sàbados a sero dae sas sete e sas domìnigas a manzanu, dae sas noe finas a s'una. Pro arribare a su tzìrculu dae s'istassione de sos trenos, faghet bisonzu su postale nr. 6, chi cheret leadu dae sa segunda pèndida a manu dereta essende dae s'istassione, cando chi unu tassì costat dae chimbe a ses euros. Su pabiru de s'assòtziu pro un'annu costat 15 euros.