Grutas de Santu Micheli (Otieri)

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Intrada de sas grutas

Sas grutas de Santu Micheli sunt grutas de orìgine càrsica chi s'agatant a sud de s'abitadu de Otieri, a pagos metros de s'ispidale tzivile.

Depent su nùmene issoro a sa presèntzia antiga de unu logu de cultu minore dedicadu a s'arcànghelu Micheli, chi bi fiat finas a su de XVIII sèculos.

S'importu archeològicu de sas grutas est istadu evidentziadu sa prima borta dae s'archeòlogu Antonio Taramelli a s'incumintzu de su de XX sèculos, cando b'at agatadu medas manufatos de fatura fine, mescamente tzeràmicas, ligados a s'eneolìticu (naradu fintzas Neolìticu reghente sardu, 3.500-2.900 a.C.) e fintzas prus antigos, chi apartenent a sa cultura de Santu Chìrigu. Sa tziviltade autora de custos manufatos est istada definida dae sos istudiosos de s'ùrtimu pustisgherra "tziviltade de Santu Micheli" e, dae sos annos setanta a oe, cultura de Otieri.

A pagos metros dae sas grutas bi nd'est un'àtera, prus minore, chi si mutit "Gruta Mara", in ue ant atzapadu àteros manufatos neolìticos (in s'ala arta de sa tzitade bi sunt unas àteras grutas de importu pro su chi pertocat a s'archeologia, che a cussas de su "Carmelo" e de "Calaresu").

Sas grutas de Santu Micheli, finas a sa fine de sos annos chimbanta, teniant una sala manna, chi però a pustis ant ispèrdidu pro fàghere unu campu de fùbalu (in ue oe b'est su parchègiu de s'ispidale).

Ligàmenes esternos

(IT) Situ ufitziale, in sardegnacultura.it. URL consultadu su 3 austu 2021 (archiviadu dae s'url originale su 3 austu 2021).