Guido Morselli

Guido Morselli (Bolonna, 15 austu 1.912-Baresu, 31 triulas 1.973) est istadu un'iscritore e un'aforista italianu.

Biografia

Guido Morselli naschit in Bolonna comente su de duos fizos de una famìlia bussante de sa bona burghesia de sa cabitale emiliana. Babu suo Giovanni est aderetadore de impresa in su domìniu apotecariale, mama sua Olga Vincenzi est fiza de unu de sos abogados prus cunnotos de sa tzitade. In su 1.914, sa famìlia si tràmudat a Milanu. Finas a s'edade de deghe annos, sa bida de Guido s'isvilupat bastante tranchilla, peroe in su 1.922 mama sua s'amalaidat seriamente de calentura ispannola e abarrat internada pro unu tempus longu.

Guido sufret pro custa largania fortzada e finas pro sas ausèntzias frechentes de babu suo, dèvidas a resones de traballu, e cando sa mama morit in su 1.924, custa pèrdida lu marcat profundamente. Su babu est semper ausente, e sena su cuntributu familiale de sa mama sas acapiaduras intre ambos sighint a si deteriorare, siat dae su puntu de bista carateriale, siat dae s'afetivu. Guido est pagu sotziàbile, intranchillu, no meda istimadore de s'iscola, peroe arrimadu dae un'intellighèntzia primadia; a s'istùdiu preferit leghiduras pessonales.

Pustis superadu disganadamente s'esàmene de maturidade in su 1.931 de individuale a pustis de esser iscorcorigradu in su 1.930, pro cumpragher babu suo autoritàriu si marcat a sa facurtade de matèrias zurìdigas de s'Universidade de s'Istadu de Milanu e cumintzat a iscrier, sena los pubrigare, sos primos insajos curtos de creze ziornalenca.

Deretu a pustis de s'indutoramentu in su 1.935, moet a sordadare e frechentat s'iscola de ufissiales de sos arpesos. Posteriormente, at a abarrare longamente in logu istranzu, iscriende reportadas ziornalencas e contos chi ant a arreare ineditados. Babu suo lu faghet cuntratare inche Caffarro comente promoidore pubritzitàriu: custa isperièntzia de traballu at a terminare a pustis de un'annu ebia, zughende a unu peoramentu de sas relassiones cun su babu. A pustis de sa morte de sorre sua istimada Luisa in su 1.938, a sos 27 annos ebia, Guido lograt dae babu suo unu bidalìtziu chi li permitit de si cunsagrare a sas atividades chi preferit dae semper: sa leghidura, s'istùdiu e s'iscritura. Sighit a redatare insajos breves e cumintzat a isterrer unu diàriu, un'avesu chi l'at a acumpanzare pro sa bida intrea.

Est autore de romanzos e insajos chi sunt istados pubrigados petzi moende cun su 1.974 (o siat a pustis de sa morte sua) pro neghe de sa postura isfavoràbile de sas domos imprentadoras, chi no aiant ischidu abaliare curretamente s'importu de sas òperas suas. E pretzisamente sos refudos sighidos de sos imprentadores nche l'aiant zutu a su zestu suitzidale cun su cale Morselli, su 31 de triulas de 1.973 in su bividorzu suo de Baresu, si nche fiat catzadu sa bida.

In sa domita de Santa Trinita chi fiat istada sua, oe s'agatat unu museu dedigadu a sas òperas suas.