Istassione de servìtziu
logudoresa. Abbàida sas àteras bariedades gràficas:
campidanesu · LSC · nugoresu
Pro istassione de servìtziu s'intentat un'istrutura destinada a s'aprovisionamentu in cumbustìbile e s'assistèntzia de sos beìculos cun motore tèrmigu e sos trasportados issoro. In realidade, dae su puntu de bista regulativu e tènnigu, diat esser prus curretu a faeddare de installadura de refornidura de carburante, sende s'istassione de servìtziu unu tipu de installadura, gasi che s'istassione de refornidura, su chioscu e su puntu isuladu.
Addae de sa dispensadura de carburantes, chi podent esser lìchidos che sa benzina e su gassozu o gassosos comente gassos de petrozu iscallados (GPI), metanu o idròzenu, bi si podent agatare àteros servìtzios comente acontzadorzos, samunadorzos de beturas, butegas, tzilleris, restorantes, imprenta diària e periòdiga. Reghentemente, gràssias a unas cantas sentèntzias de su Cussizu de Istadu e a argunas novedades regulativas, mescamente a su livellu rezionale (Apùlia, Marcas e Basilada), finas sas siendas de monopòliu cumintzant a s'agatare inche sas istassiones de servìtziu.
Sas arzolas de servìtziu sunt realizadas a una distàntzia de 30-40 km. intre issas a longu de s’autocaminu e zenerarmente servent unu ùnigu sentidu de martza. Pro custa resone, a s’avesu sunt cullocadas a crobas, s’una in cara de s’àtera, in manera a fazilitare finas sas cunessuras elètrigas, ìdrigas e telefònigas. A bias, su fraigu destinadu a sos servìtzios, incruende unu tzilleri e unu restorante, podet esser realizadu cun istrutura a ponte colende in subra de su biazadorzu. In su matessi tempus, in unos cantos autocaminos ameriganos sas arzolas de servìtziu sunt unifigadas e realizadas in sa mesania intre ambas carreradas, a mèdiu de un’inladamentu adeguadu de su partzidore de tràfigu. Podent finas incruder moteles, in ue automòbiles e bagazos nche podent cromper deretamente a dae in antis de s’aposentu.
Istòria[modìfica | modìfica su còdighe de orìgine]
Sas primas istassiones de servìtziu printzìpiant a s'ispainare in tempus de sas primas dègadas de su 1900. Cun anterioridade, in su barigare de sos primos annos de ispainadura de sos beìculos cun motore a cumbustura interna, sos carburantes fiant bèndidos in cunfessiones sizilladas in sas ispetzerias e in àteras butegas zenerales. Sa nàschida de s'istassione de servìtziu currespondet duncas cun s'imbentura de sos primos dispensadores, dispositivos a tretu de pesare su produtu petrolencu dae su reservadorzu interradu in ue est remunidu e lu pompare peri una tuberia fressìbile e una pistola dispensadora finas a su reservadorzu de su beìculu motorizadu a aprovisionare.
Sas primas istassiones de servìtziu presentaiat caraterìstigas medas diferentes intre issas e duncas dassaiant meda tretu a sa creatividade de sos prozetistas, ch'in custa manera ant realizadu unos cantos isempros sinnifigativos de un'architetura ispetzìfiga cun onzi règula.
Peri su tempus, cun sa razionalizadura progressiva de sas retzas de distribuidura e de su minimonzu cunseghidore de su nùmeru issoro, s'est dada un'istandardizadura semper prus crara de sas istassiones de servìtziu, ch'in su casu de unas cantas cumpanzias petrolencas murtinassionales mannas impreant sos matessi elementos tènnigos e de comunicadura pubritzidària in deghinas de paìsos diferentes in totu sos continentes.
Atuarmente, in Itàlia b'at addae de 24.000 istassiones de servìtiu repartzidas intre caminos e autocaminos (in ue sunt definidas mezus comente arzolas de servìtziu). Su dispensadu mèdiu issoro, chi est in aumentu progressivu, est galu in suta de sa mèdia europea, cando chi su nùmeru issoro est galu como in amenguadura sighida.
In Itàlia, finas in fatu de s'aumentu mannu de su costu de su petrozu e de su minimonzu cunseghidore de sas cunsumiduras, est prebida dae medas pessones una crèschida de su livellu de creatividade intre sos puntos de bèndida diferentes. Custu est faghende in modu ch'in prus de sas installaduras “coloradas” tradissionales, de propiedade o cuntzertadas cun sas sotziedades petrolencas beras e autèntigas, siant cunsolidende sa presèntzia issoro in sos caminos sos puntos de bèndida independentes o “arbos”, est a narrer cun unu marcu distintu dae su de sas cumpanzias, o deretamente dae sos grupos chi cuntrollant sa distribuidura cumertziale manna.