Leonardo David

Dae Wikipedia, s'entziclopedia lìbera.
Custu artìculu est iscritu in sa grafia logudoresa. Abbàida sas àteras bariedades gràficas:

campidanesu · LSC · nugoresu


Leonardo David (Gressoney-Saint-Jean, 27 cabudanni 1960 – Gressoney-La-Trinité, 26 frearzu 1985) est istadu un'ischiadore arpesu italianu.

Fiat fizu de Davide, ischiadore arpesu de livellu artu a bia sua.

Biografia[modìfica | modìfica su còdighe de orìgine]

Promissa manna de s'ischì arpesu de s'agabu de sos annos setanta, Leonardo David fiat cussideradu dae medas s'antagonista possìbile de Ingemar Stenmark su cracu isvedesu e s'erederi isportivu de Gustav Thöni.

Ispetzialista de sas dissiplinas tènnigas, mancari apat disputadu pagas porfias in sa Cupa de su Mundu, fiat resèssidu a s'evidentziare zai dae su cumintzu, arribende intre sos primos tres siat in s'islalom zigante (Schladming), siat in s'ispetziale (Kranjska Gora e Jasna). Su 7 de frearzu de 1979, aiat bìnchidu s'ùniga porfia sua, s'islalom de Osru, in dae in antis de Ingemar Stenmark e Phil Mahre s'istadunidesu.

Aiat bintu sa Cupa Europa in su 1978 e in sos Campionados Italianos aiat logradu sa medalla de brunzu in sa falada lìbera in su 1977.

Sa carrera sua fiat istada segada in curtzu dae s'intzidente grae chi li fiat intervènnidu in sa falada antisolìmpiga de Lake Placid su 3 de martzu de 1979, in ue nche fiat rutu a probe de sa raja ocasionende-si unu traumatismu carrotzale cun coma cunseghidore. Zai fiat rutu unas cantas chidas in antis, in su barigare de una falada lìbera chi si fiat isvilupada in Cortina d'Ampezzo, e in sas chidas posterioras “non resessiat a s'assussare nemancu in s'islalom zigante, ca sas bivraduras zeneradas dae sos ischìs in s'astra li causaiant dolore de conca”, comente at iscritu Paolo De Chiesa su cumpanzu suo de echipa. Nostamis de custu, aiat leadu parte a sa falada de Lake Placid in ue, cun sa raja a s'ograda, nche fiat rutu. Si fiat pesadu torra, aiat rugradu sa raja e posca si fiat istrampadu intre sos bratzos de Piero Gros. Non diat aer releadu mai prus su cunnoschimentu, malugradu s'internamentu a s'ispidale e cuidados longos in Innsbruck.

Posteriormente a s'intzidente, fiant nàschidas polèmigas a pitzos de s'oportunidade de li dassare disputare cussa falada lìbera: sas crìtigas si basaiant in su fatu chi David galu no èsseret prontu pro parare fronte a cussa dissiplina, cun resone prus manna dada sa ruta anteriora, dae sa cale paraiat chi no àeret galu recuperadu prenamente. In particulare, custu ùrtimu episòdiu si podiat interpretare comente sinzale avertidore a su cale non fiat istadu dispensadu s'atentu dèvidu. S'acotèssida aiat tentu finas sechelas zudissiàrias.

S'ischiadore zòvanu no aiat recuperadu prus finas a sa morte, acontèssida ses annos a pustis.