Liornu

Dae Wikipedia, s'entziclopedia lìbera.
Jump to navigation Jump to search

Liornu est una comuna italiana de 156.582 abitadores, cabitale de sa provìntzia tuscana a su matessi nùmene.

Sa de tres leadas de sa rezione pro pobuladura a pustis de Frorèntzia e Pradu, sa de chimbe de s’Itàlia Tzentrale e sa de bintibator de s’Itàlia, istranzat a sa sola belle sa metade de sos abitadores de sa provìntzia sua pròpia; cun sas comunas probianas de Pisa e Collesalvetti, in prus de custu, custìtuit unu cùcuru de su gasi naradu “triàngulu industriale”, chi sa pobuladura grobale totalizat addae de 260.000 abitadores.

Est postu a longu de sa costera de su Mare Tirrènigu e est unu de sos portos italianos prus importantes, siat de transitadorzu cumertziale siat turìstigu, gasi etotu che unu tzentru industriale de sinnìfigu nassionale.

Intre totu sas leadas tuscanas est abaliada avesarmente comente sa prus moderna, mancari in su territòriu suo s’agatatent diferentes testimonias istòrigas, artìstigas e architetònigas subrabìvidas a sos bombardamentos massivos de sa segunda gherra mundiale. Sa bidda, chi s’est isvilupada in manera cussideràbile dae sa segunda metade de su de XVI sègulos a boluntade de sos Medicis a sa prima e de sos Lorenas in fatu, fiat istada unu portu francu importante frechentadu dae numerosos mercaderis istranzos, sea de cunsolados e cumpanzias de navegadura. Custu aiat cuntribuìtu a afirmare, zai dae s’agabu de su millichimbighentos, sos caràteres de bidda murtiètniga e murticurturale pro esselèntzia, de sos cales, casu azomài ùnigu in Itàlia, subrabivint istigas importantes comente crèsias e campusantos nassionales, palatzos, billas e òperas de utilidade pùbriga ligadas in manera indissotziàbile a sos nùmenes de sas comunidades istranzas importantes chi aiant frechentadu su portu francu finas a sa segunda metade de su milliotughentos. Custa bogassione internassionale nch’aiat zutu a identifigare sa bidda comente Leghorn in su Rennu Aunidu e in sos IAA, Livourne in Frantza, Liorna in Ispanna, eac., in modu assimizadore a sas cabitales de istadu prus importantes de s’èpoga.

Intre su de XIX sègulos e sos primos annos de su millinoeghentos, parallelamente a s’incaminamentu de su protzessu de industrializadura, Liornu fiat istadu finas unu destinu turìstigu de sinnìfigu internassionale pro sa presèntzia de barneadorzos e tratadorzos termales fontomados, chi aiant zutu sa bidda a retzire s’aproerzu de Montecatini in s’oru de mare.

Sa bidda est famada pro su Santuàriu de Montenero, chi zughet su nùmene de Nostra Sennora de sas Gràssias patrona de sa Tuscana, gasi etotu che pro aer dadu sa nàschida a pessonalidades prestizosas che Amedeo Modigliani, Pietro Mascagni, Giovanni Fattori, Carlo Azeglio Ciampi e medas àteros. Liornu est sa sea de s’Acadèmia Navale, de su cuarteri zenerale de sa Brigada de pararutistas “Folgore” e de su Grupu de interventu ispetziale; in prus de custu, est una de sas 15 dereturas marìtimas in sas cales est partzidu s’iscaru italianu.

Sa bidda est unu de sos portos printzipales pro sas relassiones cun sa Sardinna.