Lovely Complex

Dae Wikipedia, s'entziclopedia lìbera.
Jump to navigation Jump to search

Nùgoro-Istemma.png
Articulu in nugoresu
Nùgoro-Istemma.png

Lovely Complex (ラブ★コン Rabu Kon? Love Com) est unu manga chi sa mangaka Aya Nakahara at iscrittu e disinnau. S'istoria l'an fintzas bortada ind unu film chin su matessi titulu e ind un'anime (cartone giaponesu). In prus, in su 2006 b'an fattu unu videojocu pro sa PlayStation 2. In su 7 de aprile de su 2007 an cumintzau a mandare in unda sa prima puntada de s'anime.

Istoria[modìfica | modìfica su còdighe de orìgine]

S'istoria contat s'amore istranu chi s'isvilupat a prenu tra duos cumpanzos de iscola, chi a su cumintzu non si podìan bìer s'unu chin s'ateru tantu brigavan, Risa Koizumi (小泉リサ Koizumi Risa) e Atsushi Otani (大谷敦士 Ōtani Atsushi), fentomàos in s'iscola de Osaka issoro pro si facher bìer tantu comicos in sa briga, chi su mastru etottu lis aìat postu su nomìnzu de All Hanshin Kyojin (una cropa reale de comicos giaponesos, un'ispètzia de Stanlio e Ollio orientale). Risa est, difatis, arta meda (172 chentìmetros) cufforma sa media feminìna giaponesa (chi est imbètzes 158 chentimetros); Atsushi, a s'imbesse de Risa, est bassu meda (156,2 chentimetros) cufforma a cussa mascrìna giaponesa (chi est imbetzes 172 chentimetros). Custa diferentzia de artesa (e su lùmen belle ironicu chi tenen: cussu de s'una cheret nàrrer "cantàru minore", su de s'atteru "badde manna") los fachet cumpressàos, prus de cantu non lu sian ja, ma custu est pètzi un'assimizu ebìa ca tenen a cumòne fintzas interessos e carattere. Ambosduos, in prus, cheren facher isperientzia de s'amore in sa zoventude issoro. E propriu cussu b'at a falare in sa conca de Risa, chi li cumintzat a piachere Atsushi e si nde innamorat puru a pùstis, ma issu est malu a cumprendere e issa, chind un'amore refudàu (pro duas bortas) e non corrispostu, bi sufferit e pranghet meda. Pètzi unu sentìdu de zelosìa tra Atsushi e unu professore de inglesu at a cambiare sas cosas, ponendechèlos a pare e lassande a una banda sa timidèsa. Fachendebìla a brincare (non chene dolores) impare medas difficurtades chi sa bida lis ponet addaenantis, comente traitorìas e mascamente s'issèperu de su benidore issoro chi los at a jùcher a istradas a divèssu, Otani e Koizumi s'an a promìttere de si bòlere bene a pustis puru.