Mare Càspiu

Artìculu in LSC

Bista dae unu satèllite

Su mare Càspiu (in russu: Каспийское море, Kaspijskoe more; azeru Xəzər dənizi, persianu دریای خزر daryā-ye xazar, kazacu Каспий теңізі, Kaspij Tengizi, turkmenu Hazar deňizi) est unu mare serradu chi ocupat sa parte prus fundura de una depressione intre Àsia e Europa, sa Depressione càspica, chi faghet parte de sa manna depressione aralocàspica. Est sa massa de abba interiore (lutone endoreicu) prus manna de su mundu, cun una subrafache de 371.000 km² (chene inclùere su lagu de Garabogazköl) e unu volùmene de 78.200 km³ cun caraterìsticas a comunu tantis cun is mares comente cun is lagos. A s'ispissu est cunsideradu su lagu prus mannu de su mundu, cun totu chi no est de abba durche si nono salida. Tenet numerosas ìsulas, sa prus manna de is cales est sa de Ogurja Ada, chi tenet 47 chilòmetros de longària; a manu de su norte sa majoria de is ìsulas sunt minores e disabitadas.

Geografia

Su mare Càspiu est sa massa majore de abba continentale de su mundu e chi ddu cunsideramus che lagu rapresentat intre su 40 e su 44 pro chentu de su totale de is abbas lacustres de su mundu. S'agatat inghiriadu dae Rùssia in s'ovest, s'Azerbaigian in su sud-ovest, de s'Iran in su sud, de su Turkmenistàn in su sud-estu e dae su Kazakhistan in su norte e in s'estu, in ue s'agatant is istepas de s'Àsia Tzentrale. A su sud-ovest de su Càspiu b'ant is montes de su Càucasu, e in su sud su massitzu de s'Elburz. In sa costera orientale, in su Turkmenistàn, tenet un'intrada manna in forma de golfu narada Garabogazköl.