Nadadorzu

Unu nadadorzu (evitare s’italianismu “pischina”, ch’in sardu tenet un’àteru sinnìfigu) est una bartza artifitziale prenada cun aba durche misturada cun una prochentale minore de croro desinfetadore, ammanitzada zenerarmente pro su nadu o àteras atividades in s’aba. B’at finas nadadorzos cun aba salida o de mare chi non tenent bisonzu de croradura.

Su primu nadadorzu de su cale si tenet noa e in ue galu como bi sunt sos abarros est su Banzu Mannu de Mohenjo-daro, de sa Tzivilidade de su badde de s’Indo, in su Pachistanu de oe. Su nadadorzu remontat a su de III millènnios i.a.e.n. e medit 12 metros pro 7. Sos primos nadadorzos de s’edade cuntempurana fiant istados fraigados in Londra in su 1.837. Sos Banzos de Diana sunt cussiderados su primu nadadorzu pùbrigu realizadu in Itàlia, cuncretamente in Milanu in su 1.842.

Podet esser de formas e dimensiones bariadas, de diferentes profundidades, istofadu in sa terra o isternu, cun istrutura in betone armadu, atzarzu, allumìniu, linna e rebestida cun tzeràmiga o petzi pinturada cun barnitzas particulares prastifigadoras, o puru impermeabilizada cun rebestimentu in CPB o rèsinas tzementencas. Faghet bisonzu unu mantenimentu sighidu pro s’innetadura e su tratamentu de sas abas (contra a pazamarina, sedimentos, ludu e fozàmine si s’agatat in foras, eac.).

Sa longària regulamentare de unu nadadorzu impreadu pro sas porfias ufissiales est de 50 m. (nadadorzu olìmpigu); fitianu s’atopant istruturas de 25 m. (bartza minore), chi mìnimant sos costos de fraigamentu e mantenimentu e su tretu netzessàriu, peroe permitent su matessi s’acussamentu in sas distàntzias impreadas a s’avesu. Sa forma de ambas bartzas naradas est retangulare.

Sos nadadorzos impreados cun finalidade recreativa tirant a esser fraigados in sa forma e in sas dimensiones prus inditadas pro s’arzola a disponimentu.

Cun atualizadura finas a su 2.008, su nadadorzu prus mannu de su mundu s’agatat in San Alfonso del Mar, unu trighinzu de sa bidda tzilena de Algarrobo, a unos 90 km. dae Santu Tiagu sa cabitale. Est longu 1.013 metros, tenet un’arzola de 8 ètaras (su tantu de 6.000 nadadorzos istandardizados), cuntenet 250.000 metros cubos de aba e nche sizit una profundidade de 35 metros.

Su nadadorzu tzertifigadu prus profundu de su mundu s’agatat in Bèrziu in Uccle, a probe de Brussellas, e est naradu “Nemo 33” cun referèntzia a sa profundidade sua (34,5 metros in su puntu prus profundu).