SBS - Servìtzios Bibliogràficos Sardos
Artìculu in LSC
Su sistema SBS - Servìtzios Bibliogràficos Sardos est unu situ ìnternet creadu pro èssere un'aina pro chie chircat unu libru publicadu in Sardigna dae un'editore locale. In su situ de SBS benint postas, in una retza ùnica, totu sas informatziones chi pertocant a sos libros sardos, ponende in paris totu sos protagonistas de sa filera de su libru: clientes, librerias, editores, distribudores, agentes, bibliotecas, iscolas e operadores culturales.
Creadu comente unu progetu pro frunire a s'utèntzia unu servìtziu pro sa chirca de sas publicatziones libràrias produidas in Sardigna, e pro promòvere sa produtzione editoriale librària isolana, impreat sas tecnologias informàticas e unu traballu de regorta de sas informatziones pro lu fàghere.
Pro su letore, SBS funtzionat che a unu catàlogu cummertziale modernu, cuncordadu sighende sos istandard internatzionales, disponìbile in suportos medas e chi chircat de tènnere sa difusione màssima. A s'utèntzia professionale chi impreat su sistema, SBS podet frunire servìtzios a pagamentu.
Su sistema SBS est unu organismu privadu e indipendente, chi sighit sos critèrios ISDB e ISTAT in sa descritzione de sos tìtulos.
Su situ est a disponimentu in tres limbas: sardu, inglesu e italianu, e tenet fintzas feeds RSS, partzidos pro categoria e gènere de libru, chi permitint de abarrare informados pro su chi pertocat a sas publicatziones e a sos eventos noos.