Su Hobbit

Dae Wikipedia, s'entziclopedia lìbera.

Nùgoro-Istemma.png
Articulu in nugoresu
Nùgoro-Istemma.png

Sa prima pagina de s'editzione americana (1938).

Su Hobbit (in limba orizinale The Hobbit o There and back again, ovverosiat "tuccàda e torràda") est unu romantzu fantasy chi John Ronal Ruel Tolkien aìat iscrittu e prubicau pro sa prima bìa in su 1937. Su sichidore suo at a esser Su Sennore de sos Aneddos (The Lord of the Rings).

Su romantzu tenet unos cantos elementos de importu, chi si acattan in sos atteros traballos de Tolkien in supra de sa Terra de Mesu: s'Unicu Aneddu at a essere su tema tzentrale de Su Segnore de sos Aneddos, mentras chi sas ispadas elficas anticas de Gondolin nos torran a ammentare su chi contat su Silmarillion. Su tema de s'eroismu est tzentrale, ca su romantzu in medas lu an bìdu comente una metafora de sa Prima Gherra Mundiale, in ube massajos e zente de campagna in generale fit ghettada in su trintzeramentu nande chi sa gherra fit "atzione eroica".

Su Hobbit e sos atteros duos libros postos a pare fachen un'unicu contu chi addurat pro tottus sas battor Eras chi Tolkien si aìat immazinau. In sa Prima Era, chi contat su Silmarillion, b'at sa cosmogonìa, sa genesi de sas ratzas (posta a banda cussa de sos Hobbit) e su chi zirat in tundu a su primu Segnore iscùru, Melkor; in sa de duas, chi nde contat s'appendice a Su Segnore de sos Aneddos e a s'Akallabêth (parte de su Silmarillion), b'at s'artziada e sa rutta de su regnu de sos Omines de Nùmenor e sa sestadura de sos Anellos de sos Elfos, chi los azuat in custu Sauron, novu Segnore iscuru poi ispèrdiu chin s'alliantzia manna tra Omines e Elfos. In sa de tres, chi nde contan siat su Hobbit siat su Segnore de sos Aneddos, b'at sa reconchista de s'ascusòrju nanicu chi aìat furau Smaug e sa gherra de s'Aneddu, torra contr'a Sauron. In sa de battor, chi no nde contat perunu libru, sos Omines pican su podere in sa Terra de Mesu acabbande sas atteras ratzas.

Istoria[modìfica | edit source]

Su maghiàrju Gandalf, paris chin trèichi nanos, fachet bìsita a Bilbo Baggins, unu hobbit chi vivet in Hobbiville, in sa Contea, e li ispiegat chi custos nanos, chi los cumandat Thorin Iscududechèrcu, bolen torrare a conchistare su regnu de Erebor, sa domo chi tando fit issoro prima chi lìlla furèsit s'iscurtone Smaug. Gandalf lu arròlat che iscassinadore, ca est bravu a iscassinare, e sos cumpanzos li promittin su battordichèsimu de s'ascusorju chi b'est in sa muntagna. Bilbo, comente tottus sos hobbit, est unu chi li piachet abbarrare in dommo fughinde su periculu, ma dorminde e pipande, ma a sa fine lu cumbinchen e tando tuccat chin sos nanos. A pustis de unu muntone de avventuras, sos cumpanzos arriban a Erebor e la illìberan dae su iscurtone. Bilbo ch'at a torrare a dommo riccu e chind unu aneddu de cabàle mannu.