Sukeban

Articulu in nugoresu

Chin su favèddu sukeban (スケバン, si pòdet fìntzas iscrìver 女番 e スケ番) est a inditàre sas teppas femenìnas chi bi aìat in Giappone in sos annos Settanta. Est una cràsi de sas paràgulas "suke" (女, pitzòcca) e "banchō" (番長 "mere") e est riferìa a su capu de sa banda.

Caratteristicas

Su favèddu lu impreàban, a su comìntzu, pètzi sos chi fachìan parte de sas bandas, ma dae su 1972 in sùsu est de imprèu comùnu pro tottus sos giapponesos. Sa caratteristica printzipàle de sas sukeban sun sos pilos bistòsos meda, ca sun tìntos o fattos chin sa permanènte, su fuku classicu de marinèri unu pacu acontzàu, chin sas mìzas coloràdas e una fardetta allonghiàda.

Sas sukeban si dàban a su bagassùmine, a s'irrobatòrju e a sa violèntzia, e fit sòlitu a nde bìer tèppas s'una contr'a s'attera. Pro sa prus parte fin pitzoccas chi sos atteros ponìan a bànda, o istudiàntes faddìas chi si attroppàban a banda pro paràre frònte a sa sotziedade giapponesa. Sas armas chi sas sukeban nde fachìan imprèu fin cadènas, talliarìnas e lammièddas.