The Elder Scrolls V: Skyrim

Articulu in nugoresu

The Elder Scrolls V: Skyrim est s'episodiu de chimbe de sa sèria The Elder Scrolls chi Bethesda Softworks, criadora e erede puru de atteras serias de sutzessu, comente Fallout, RAGE o Brink. Est unu videojocu de ruolu in ube picamus sa parte de unu ex-cundannau a sa furca, chi est in realtade sa pessona chi su destinu at isseperau pro illiberare sa provintzia de Skyrim dae su periculu de sos iscurtònes, chi sun torrande a vivere ind unu periodu de gherra (tzivile e non) ja bastante bulluzau.

Su jocu est essiu in s'ùndichi de Sant'Andrìa de su 2011 pro PlayStation 3, Xbox 360 e PC.

Locu de jocu

Skyrim est una de sas provintzias prus a nord de su mundu de Tamriel, sende su capu de locu suo una tzittade chi si narat Solitude. Su fattu de istare tantu a nord e puru in territoriu de muntagna at fattu a manera chi su clima in tottu sa regione siat frittu e b'apat belle semper iberru. Lacos cancaraos e gruttas prennas de istallatitas e istalagmitas sun sos locos chi s'an a bier de prus.

Custu clima est tantu frittu chi sa zente sua puru s'at accostumau a vivere in mesu a s'astragu, fravicande domos unu pacu in sutta de terra pro bi la facher a s'inclementzia de su tempus malu. Sa ratza chi bi vivet menzus e bi cumandat sun sos Nordicos, populu chi si assimizat a sos vichingos (tantu est beru chi sos àvos issoro, sos Skáld, tenen su matessi lumen de sos poetes issoro!) e vivet in biddas ispèrdias chi sos montes inghìrian.

Istoria printzipale e quest secundarias

S'istoria printzipale contat sa torràda a vivere de sos iscurtònes, chi si credìan estintos, pro more de su fizu malu de Akatosh, Alduin, e de su sìdis suo pro su podere: custu, postu ind unu cuntestu in ube s'impèrju de Tamriel ch'est a bellu a bellu morindesìche pro sa colonitzatzione de sos Elfos Artos (Altmer) e sos Nordicos, pro resones religiosas, sun gherrande pro s'indipendentzia contr'a unu podere chi est ja dèbile. A banda de sa quest printzipale, b'at finas assòtzios chi nd'an de proprias. Custas sun:

• Iscura Cunfrarìa
• Cullètziu de sos maghiarjos de Winterhold
• Sos cumpanzos (gherrèris)
• Grèmiu de sos Ladros