Tinteri

Su tinteri (paraula intrada cun probabilidade a sa limba sarda peri s’ispannolu “tintero”) est unu retzipiente minore, fitianu de bidru, portzellana, prata, latone o pertru.

Postu a curtzu de sa pessone chi devet iscrier, cuntenet sa tinta impreada pro s’iscritura a mèdiu de su càlamu o cun pinna rapresentada dae una pertighedda puntzitada o dae un’istremidade de una pinna de un’ae o de una temperedda infilada a una pertighedda.

Su tinteri servit finas pro cuntenner sa tinta utilizada pro prenare sas pinnas istilogràfigas.

Sa tinta cuntènnida in su tinteri est unu lìchidu coloradu (fitianu nieddu) cun diferentes pigmentos che tintieddu, ranos bezetales, minerales bariados, cun su cale si trassant sos sinnos ideogràfigos o sillàbigos in superfìtzies sùtiles, in colore craru o arbu, che sos pabellos, su pabiru o su bargaminu.

Unu tinteri tenet fitianu unu cavacu pro evitare s’ispaporadura, s’essida intzidentale o s’isponidura etzessiva a s’àera de sa tinta.