Francesco Alziator
Articulu in LSC
Francesco Alziator (Casteddu, 1909 - 1977) est istadu unu iscritore, giornalista e istudiosu de traditziones populares.
[acontza] Biografia
Laureadu in lìteras in su 1932 e in iscièntzias polìticas duos annos a pustis, zai in su 1928 L'Unione Sarda publicat su primu artìculu suo, Prefiche e canti funebri; in su matessi annu cumintzat a collaborare cun sa rivista Mediterranea. In su 1929 tres poesias suas sunt publicadas in Il lunedì dell'Unione. Semper in sos annos de s'universidade s'est distintu collaborende cun R. Ciasca a sa Bibliografia della Sardegna.
Fassista cumbintu, at fatu parte de s'organizatzione culturale de su G.U.F. (Gioventù Universitaria Fascista); at leadu parte finas a sos prelitoriales e a sos litoriales de sa cultura. At cumbàtidu in sa segunda gherra mundiale e, essende sordadu, at collaboradu cun paritzas testadas: L'Unione Sarda, Il giornale d'Italia, Marzocco, Tempo di Roma, Mediterranea e Sud-Est. Sa morte de su babu, in su 1943, suta de sos bombardamentos americanos li faghet cambiare ideas polìticas.
A pustis de su cunzedu, in su 1945, at cumintzadu sa carrera de professore de lìteras in sos istitutos superiores de Casteddu; at traballadu in s'Istitutu mazistrale Eleonora d'Arborea e in s'Istitutu tècnicu agràriu Duca degli Abruzzi. In s'universidade de sa capitale isulana est devènnidu assistente de Lìteras italianas. Su cuotidianu L'Unione Sarda non bi l'at chèrtu prus comente collaboradore pro su passadu suo de fassista. Tando at collaboradu cun L'Arcobaleno e Il convegno.
In su 1954 publicat Storia della letteratura di Sardegna. A pustis publicat unas cantas òperas subra de sas traditziones populares isulanas: Storiografia delle tradizioni popolari di Sardegna e Il folklore sardo, publicadas ambas in su 1957. torrat a collaborare cun L'Unione Sarda finas a su 1963, comente espertu de demologia. Su 14 de trìulas de su 1961 est nominadu membru de s'Acadèmia de Buenas Letras de Barcellona. In su 1969 at otentu s'incàrrigu in s'Universidade de Tàtari comente lìberu dotzente de Traditziones populares.
[acontza] Òperas
- Alziator F., L'Elefante sulla torre. Itinerario cagliaritano, 1979-1982
- Alziator F., Attraverso i sentieri della memoria, 1979
- Alziator F., I giorni della laguna, 1977
- Alziator F., Verso la storia dell'abbigliamento popolare in Sardegna, 1964
- Alziator F., La città del sole, 1963
- Alziator F., Picaro e folklore e altri saggi di storia delle tradizioni popolari, 1959
- Alziator F., Il Folclore Sardo, Cagliari, 1957.
- Alziator F., Storiografia della tradizioni popolari di Sardegna, 1957
- Alziator F., Storia della letteratura di Sardegna, 1954
